Ukraina hap fabrikën e dronëve në Britani, nis procesi i parë i prodhimit

Fabrika e parë ukrainase e prodhimit të dronëve ka filluar operacionet e saj në Britani, tha të mërkurën ambasadori i Ukrainës Valeriy Zaluzhnyi.

Zaluzhnyi, një ish-komandant i forcave të armatosura ukrainase, tha se prodhuesi, Ukrspecsystems, i themeluar në vitin 2014, kishte provuar efikasitetin e dronëve të tij në vijën e frontit.

“Ukraina po lufton një luftë mes sulmeve të vazhdueshme me raketa, shkatërrimit të infrastrukturës dhe kërcënimeve ndaj objekteve të prodhimit. Prandaj, nisja e prodhimit në Mbretërinë e Bashkuar ka një logjikë të thellë strategjike”, tha Zaluzhnyi në Telegram.

“Ky nuk është një zhvendosje e qendrës së gravitetit larg Ukrainës. Është një zgjerim i aftësive tona të përbashkëta dhe krijimi i një linje të dytë mbrojtjeje që garanton vazhdimësinë e prodhimit”, shtoi ai.

Industria e mbrojtjes e Ukrainës është rritur me shpejtësi gjatë katër viteve të luftës me Rusinë. Kapaciteti i saj prodhues vlerësohet në 50-55 miliardë dollarë këtë vit, duke përmbushur më shumë se 50% të nevojave të ushtrisë ukrainase.

Industria po përgatitet tani të fillojë eksportet, duke përfituar nga reputacioni i saj “i provuar në fushëbetejë” për të ndihmuar në forcimin e ekonomisë ukrainase dhe të të ardhurave buxhetore, ndërkohë që mbështet vijat e frontit.

Zaluzhnyi tha se qendra e ekspertizës inxhinierike do të mbetej në Ukrainë, ndërsa prodhimi do të integrohej në industrinë e mbrojtjes së Britanisë.

Rruga Press