Ministrat e Jashtëm të BE-së diskutojnë kredinë për Ukrainën dhe sanksionet ndaj Rusisë

Ministrat e Jashtëm të BE-së do te mblidhen sot në Bruksel për të diskutuar kredinë e re për Kievin dhe paketën e 20-të sanksioneve ndaj Rusisë për shkak të luftës në Ukrainë.

Bisedimet vijnë një ditë para përvjetorit të katërt të pushtimit të plotë të Rusisë më 24 shkurt 2022.

Kredia prej 90 miliardë eurosh u ra dakord fillimisht në dhjetor dhe u miratua nga Parlamenti Evropian.

Financimi synon të përmbushë nevojat financiare të qeverisë ukrainase deri në fund të vitit 2027, duke i mundësuar asaj t’i rezistojë më tej Moskës.

Megjithatë, ministri i Jashtëm hungarez Péter Szijjártó njoftoi të premten se Budapesti do ta bllokonte kredinë – nëse nafta ruse e eksportuar në Hungari nëpërmjet tubacionit “Druzhba” nuk rifillonte.

Burimet ukrainase thanë se dërgesa e naftës është ndërprerë nga bombardimet ruse që nga fundi i janarit.

Hungaria dhe Sllovakia, të cilat gjithashtu vazhdojnë të marrin naftë ruse nëpërmjet tubacionit, akuzojnë udhëheqjen ukrainase se kanë penguar qëllimisht rifillimin e dërgesave.

Më shumë sanksione të BE-së ndaj Rusisë?

Diskutimet ka të ngjarë të përqendrohen gjithashtu në paketën e 20-të të sanksioneve ndaj Rusisë, duke përfshirë një ndalim të shërbimeve detare që lidhen me eksportet e naftës bruto ruse.

Krahas masave që synojnë eksportet e karburanteve fosile të Rusisë, Komisioni Evropian ka propozuar gjithashtu kufizime shtesë financiare, për të kufizuar më tej aftësinë e Rusisë për të kryer pagesa ndërkombëtare për të financuar aktivitetet ekonomike.

Takimi do të trajtojë gjithashtu luftën në Gaza dhe Bordin e Paqes të presidentit të SHBA-së Donald Trump.

Një komisioner i BE-së mori pjesë në rolin e vëzhguesit, në takimin e parë të këshillit javën e kaluar, duke marrë kritika nga Franca.

Përveç kësaj, ministrat e Jashtëm të BE-së do të diskutojnë gjithashtu krizën në rritje në Iran dhe situatën në Siri.

Rruga Press