VV: Një parti e lidhur me aktet terroriste nuk mund të marrë pjesë në zgjedhje

Lëvizja Vetëvendosje ka deklaruar se një subjekt politik i përfshirë në veprime terroriste, si sulmi i Banjşkës, nuk mund të lejohet të marrë pjesë në proceset zgjedhore të Kosovës. Përfshirja e një partie që lidhet me akte dhune dhe terrorizëm përbën kërcënim të drejtpërdrejtë për demokracinë, rendin juridik dhe sigurinë kombëtare.

Në reagimin e bërë publik, VV thekson se lejimi i një partie të tillë në zgjedhje do të legjitimonte terrorin si mjet politik, do të minonte besimin e qytetarëve në institucionet demokratike dhe do të komprometonte integritetin e procesit zgjedhor.

Partia sqaron se vota e saj kundër Listës Serbe është e bazuar në dyshimet e forta për organizimin dhe ekzekutimin e sulmit të nxitur nga Serbia në Banjşkë, si dhe në faktin që Lista Serbe nuk është distancuar asnjëherë nga këto veprime.

VV vë në pah edhe një problem tjetër të rëndësishëm: presionin e vazhdueshëm që qytetarët serbë të Kosovës vazhdojnë të përjetojnë nga Beogradi përmes Listës Serbe — përfshirë intimidime, kërcënime dhe incidente të rënda dhune. Sipas VV-së, kjo situatë ua pamundëson serbëve të Kosovës ushtrimin e lirë të të drejtave demokratike dhe bie ndesh me standardet ndërkombëtare.

Lëvizja thekson se qëndrimi i saj nuk përbën diskriminim ndaj qytetarëve serbë dhe as mohim të të drejtës së tyre për përfaqësim politik. Përkundrazi, ajo thotë se vota kundër Listës Serbe është një qëndrim kundër akteve terroriste që synojnë shtetësinë e Kosovës dhe kundër atmosferës së frikës e presionit që, sipas saj, i imponohet komunitetit serb në Kosovë.

Në fund, Vetëvendosje nënvizon se mbështet të drejtën e çdo qytetari, përfshirë serbët e Kosovës, që të zgjedhin lirshëm përfaqësuesit e tyre pa ndërhyrje politike, kërcënime apo dhunë.

Rruga Press