Rutte: Nëse s’ka marrëveshje, do të vazhdojmë me armë dhe sanksione kundër Rusisë
“Është mirë që procesi i paqes është duke u zhvilluar; vetëm SHBA-të, nën udhëheqjen e Presidentit Trump, mund ta thyejnë ngërçin.
Por nëse nuk ka rezultate, është thelbësore që armët të vazhdojnë të rrjedhin drejt Ukrainës, siç po ndodh sot falë iniciativës PURL dhe ndihmës dypalëshe, dhe që sanksionet ekonomike të vendosura ndaj Rusisë të ndikojnë, gjë që po ndodh.”
Sekretari i Përgjithshëm i NATO-s, Mark Rutte, e bëri deklaratën me të mbërritur në takimin e Ministrave të Jashtëm. “Është mënyra më e mirë për t’ia ndryshuar mendjen Putinit”, raporton ANSA.
Sakaq pesë orë bisedime midis presidentit rus Vladimir Putin dhe negociatorit të lartë të presidentit amerikan Donald Trump, duket se nuk kanë arritur të sjellin ndonjë përparim në sigurimin e një marrëveshjeje paqeje për Ukrainën.
Një zëdhënës i Kremlinit tha se takimi në Moskë ishte “konstruktiv”, por pjesë të planit mbetën të papranueshme për Rusinë.
I dërguari special i Trump, Steve Witkoff, dhe dhëndri i tij, Jared Kushner, morën pjesë në bisedime pas disa javësh diplomacie intensive që synonin përfundimin e luftës. Ekipi amerikan nuk ka komentuar që kur është larguar nga Moska.
Më herët të martën, Putin tha se ndryshimet e propozuara nga Kievi dhe Evropa në një plan paqeje të mbështetur nga SHBA-të ishin të papranueshme, duke shtuar se nëse Evropa “dëshiron të shkojë në luftë dhe e fillon një të tillë, ne jemi gati tani”.
Ukraina dhe aleatët e saj kanë lobuar te SHBA-të për të ndryshuar draft-marrëveshjen e paqes, për të cilën Shtëpia e Bardhë është përpjekur të sigurojë një marrëveshje të shpejtë dhe Kremlini më parë ka lënë të kuptohet se është i hapur.
Ky plan, i cili u pa gjerësisht si i favorshëm për Rusinë pasi u publikua në media në nëntor, ka pësuar disa ndryshime në javët e fundit.
I pyetur në lidhje me propozimin pas takimit në Moskë, ndihmësi i lartë i Putinit, Yuri Ushakov, tha se Kremlini “u pajtua me disa pika… por disa gjëra i kritikuam”. Ai shtoi: “Nuk kemi dalë ende me një version kompromisi… Na pret shumë punë përpara.”
Mosmarrëveshjet kryesore midis Moskës dhe Kievit mbeten, duke përfshirë edhe çështjen e Ukrainës që pranon të lëshojë territorin që vazhdon ta kontrollojë dhe garancitë e sigurisë të ofruara nga Evropa.
Moska dhe aleatët evropianë të Ukrainës mbeten gjithashtu në mosmarrëveshje të thella lidhur me pritjet e tyre se si duhet të duket një zgjidhje paqeje.
Duke folur përpara bisedimeve, Putin sulmoi ashpër udhëheqësit në kontinent që kanë mbështetur përpjekjet mbrojtëse të Kievit për luftë që kur Rusia nisi një pushtim në shkallë të plotë në vitin 2022.
Ai tha se udhëheqësit evropianë kishin iluzionin se mund t’i shkaktonin një disfatë strategjike Rusisë. Vendi i tij, tha ai, “nuk po planifikonte të shkonte në luftë me Evropën – por nëse Evropa papritmas dëshiron të shkojë në luftë dhe e fillon një të tillë, ne jemi gati tani”.
Presidenti ukrainas Volodymyr Zelensky tha se priste të informohej mbi bisedimet e Kremlinit nga ekipi amerikan pas takimit, megjithëse nuk ishte e qartë nëse Witkoff dhe Kushner do të fluturonin për në Kiev apo kryeqytete të tjera evropiane për negociata të mëtejshme ballë për ballë.
Duke folur përpara se të zhvilloheshin bisedimet në Kremlin, udhëheqësi ukrainas tha të martën se kishte një mundësi për t’i dhënë fund luftës “tani më shumë se kurrë”, por se elementët e propozimeve ende duheshin përpunuar.
“Gjithçka varet nga diskutimet e sotme”, tha Zelensky në një konferencë për shtyp gjatë një vizite zyrtare në Irlandë.
Zelensky tha se nuk kishte “zgjidhje të thjeshta”, duke përsëritur këmbënguljen e vendit të tij që Kievi të marrë pjesë në diskutimet për paqen dhe që të bien dakord për garanci të qarta sigurie, siç është anëtarësimi në NATO – një veprim i kundërshtuar prej kohësh nga Rusia dhe i përjashtuar nga Trump.
“Ne duhet ta ndalojmë luftën në një mënyrë të tillë që brenda një viti, Rusia të mos kthehet më”, shtoi Zelensky.
Përfaqësuesit ukrainas kanë zhvilluar dy raunde bisedimesh të nivelit të lartë mbi draftin e planit në javët e fundit, në të cilat kanë marrë pjesë Witkoff, Kushner dhe Sekretari i Shtetit i SHBA-së, Marco Rubio.
Rruga Press