Kusari-Lila: Votimi i diasporës jashtë ambasadave është standard evropian, LDK po tregon paranojë
Kryetarja e partisë Alternativa, Mimoza Kusari-Lila ka reaguar ashpër ndaj deklaratave të zyrtarëve të LDK-së që kundërshtojnë hapjen e qendrave të votimit për diasporën jashtë përfaqësive diplomatike.
Në një reagim publik, ajo ka theksuar se kufizimi i votës për qytetarët jashtë vendit është “një humbje e jashtëzakonshme për demokracinë e Kosovës”.
“Votimi i Diasporës Kosovare jashtë ambasadave dhe konsullatave është praktikë e aplikuar edhe në vendet e BE-së,” ka deklaruar Kusari-Lila, duke shtuar se qindra mijëra qytetarë kosovarë jetojnë jashtë vendit dhe pengimi i tyre për të votuar paraqet cenim të drejtpërdrejtë të të drejtave demokratike.
Kryetarja e Alternativës ka vlerësuar si “shqetësuese dhe paranoike” deklaratat e përfaqësuesve të LDK-së, të cilët kundërshtojnë mundësinë e votimit në shkolla, qendra komunitare dhe objekte të tjera ku mblidhen qytetarët kosovarë në mërgatë.
“Mosmundësimi i kësaj forme votimi përbën një shans të humbur për Kosovën dhe komunitetin tonë jashtë vendit,” ka theksuar ajo.
Kusari-Lila ka sjellë shembuj nga praktikat ndërkombëtare për të treguar se votimi jashtë ambasadave është i zakonshëm dhe i pranuar gjerësisht:
– Turqia, sipas saj, organizon qendra votimi në shkolla dhe qendra komunitare në vendet me diasporë të madhe.
– Rumania dhe Kroacia hapin dhjetëra qendra votimi në vende të ndryshme të botës.
– Moldavia ofron qendra votimi në 45 shtete.
– Edhe vende të BE-së si Franca, Italia dhe Spanja, thotë ajo se kanë modele që lehtësojnë votimin e diasporës pa nevojë udhëtimi në ambasada.
“Vota e diasporës nuk është opsionale, por pjesë thelbësore e legjitimitetit demokratik të Kosovës,” ka deklaruar kryetarja e Alternativës, duke theksuar se mërgata vazhdon të kontribuojë në mënyrë të jashtëzakonshme në zhvillimin ekonomik, kulturor dhe social të vendit.
Ajo ka kritikuar subjektet që kundërshtojnë hapjen e qendrave të votimit, duke thënë se disa aktorë politikë “frikësohen nga ballafaqimi me vullnetin e qytetarëve tanë jashtë vendit”.
Kusari-Lila ka përsëritur qëndrimin e saj se hapja e qendrave të votimit jashtë përfaqësive diplomatike është jo vetëm një standard demokratik, por edhe një mundësi që Kosova të tregojë se respekton të drejtën e çdo qytetari për të vendosur mbi të ardhmen e vendit të vet.
Rruga Press