“Afërsia me Putinin” – Euractiv: Socialistët e Evropës do ta përjashtojnë partinë e Ficos në tetor
Aleanca evropiane e partive socialiste do ta përjashtojë përgjithmonë partinë e Kryeministrit sllovak Robert Fico, partinë Smer, në një kongres që do të mbahet muajin e ardhshëm, thanë për Rapporteur – buletinin kryesor të Euractiv – katër persona me njohuri të drejtpërdrejtë mbi vendimin.
Presidenti i Partisë së Socialistëve Evropianë (PES), Stefan Löfven, ish-kryeministër suedez, do ta paraqesë përjashtimin për ratifikim kur delegatët të mblidhen në Amsterdam më 16 tetor. PES bashkon partitë socialiste dhe socialdemokrate në nivel kombëtar nga të gjitha vendet e Zonës Ekonomike Evropiane, si dhe nga Britania e Madhe.
Ky veprim vjen pasi progresistët kanë humbur durimin me Ficon, i cili është afruar me Vladimir Putinin dhe Xi Jinpingun, dhe akuzohet se po e shkel shtetin e së drejtës në vendin e tij. Në tetor 2023, partia Smer u pezullua pasi formoi qeveri me partinë ultranacionaliste SNS.
Përjashtimi do ta lërë Ficon më të izoluar në nivel evropian, pa asnjë rrugë për t’u rikthyer në rrjedhën kryesore ku dikur kishte vendin e tij. Në Bruksel dhe Strasburg, ligjvënësit e tij tashmë operojnë në margjinat e Parlamentit, dhe ai ka penguar përpjekjet e BE-së për të sanksionuar Rusinë dhe për të reduktuar varësinë nga energjia ruse.
“Besoj se fakti që evropianët po ushtrojnë presion, dhe që njerëzit në Sllovaki po ushtrojnë presion, do t’ua hapë sytë shumë votuesve të tij,” tha Lucia Yar, eurodeputete nga partia Progresive e Sllovakisë, partia kryesore opozitare.
“Ata po shohin që ai jo vetëm që ka bashkëpunuar me nacionalistët, por edhe me Putinin, me Xi Jinpingun, me të gjitha llojet e autoritarëve,” shtoi Yar, e cila më parë ka punuar për Euractiv në Sllovaki.
Partia Smer është kontaktuar për një koment.
Protesta kundër qeverisë po mbahen të martën në mbrëmje në 16 qytete, të organizuara nga Progresive e Sllovakisë dhe parti të tjera të vogla opozitare.
Partia e Ficos ishte pezulluar nga PES edhe në vitin 2006 për të njëjtën arsye: kishte hyrë në qeveri me partinë SNS.
“Ka pak gjasa që kjo të ketë ndonjë ndikim në Sllovaki,” tha Anton Spisak nga think tank-u Centre for European Reform, lidhur me vendimin për përjashtim. “Fico është pozicionuar si kundërshtar i rrjedhës kryesore të BE-së dhe asnjë nga votuesit e tij nuk do të shqetësohet nga ky vendim.”
“Në fakt, ky vendim ka ardhur shumë vonë,” përfundoi Spisak.
Rruga Press