Dielli dhe Diella – Në Shqipëri, edhe Inteligjenca Artificiale ka patronazhistin real

Shkruan Lutfi Dervishi

Në qeverinë e katërt të Rilindjes, pas gjithë ministrave me “eksperiencë të gjatë” dhe shpesh traumatike me tenderat, erdhi koha të provohet diçka e re: Ministrja e Inteligjencës Artificiale – Diella.

– “Nga sot, prokurimet publike do t’i bëjë vetëm inteligjenca, jo injoranca!” – shpalli solemnisht Dielli.

Heshtja në sallë u thye nga një pyetje që ndodhet në kokën e çdo shqiptari.

– Po çfarë garancish kemi që Diella nuk do të korruptohet?

Dielli ngriti vertikalisht vetullën e djathtë:

– Diella është artificiale, nuk ka bark për darka, nuk ka çanta për lekë, nuk pranon vila për dhurata. Pra, është e pakorruptueshme! Pikë.

Nga fundi i sallës një gazetar mori guximin të pyesë.

– Po mirë, në Shqipëri edhe engjëjt kur vijnë bëhen klientelistë. Ju keni thënë se edhe gjermani po të vijë këtu bëhet shqiptar në pelivanlleqe.

Ministrja Diella, me zë elektronik, foli për herë të parë:

– Unë jam e programuar të ndjek gjithmonë Diellin. Mbretin Diell. Nëse Dielli nënshkruan tenderin, unë e verifikoj që firma e tij është korrekte… me firmën time.

Dielli qeshi. Salla qeshi. Një gazetar kritik me qeverinë postoi në facebook thënien: Në Shqipëri, edhe Inteligjenca Artificiale ka patronazhistin real – Diellin.

Rruga Press