REUTERS – Shekulli i tretë pas Krishtit/ Varri i një të pasuri u zbulua në Bulqizë

Nga Fatos Bytyçi dhe Florion Goga/

Reuters/ Arkeologët në Shqipëri kanë zbuluar një dhomë të madhe varrimi romak që daton nga shekulli i tretë deri në të katërt pas Krishtit, e para e këtij lloji e gjetur në vendin ballkanik që dikur ishte pjesë e Perandorisë Romake.

Të njoftuar nga vendasit që kishin vënë re disa gurë të pazakontë në një pllajë pranë kufirit me Maqedoninë e Veriut, stafi i Institutit të Arkeologjisë filloi gërmimet në fillim të gushtit dhe gjeti strukturën nëntokësore, pllakat e mëdha të gurit gëlqeror të së cilës ishin të gdhendura me shkronja greke.

“Mbishkrimi na tregon se personi i varrosur këtu quhej Gelliano, një emër tipik i periudhës romake. Jemi të pasigurt për identitetin e individit të dytë, por ka të ngjarë të jetë një anëtar i familjes”, tha Erikson Nikolli, arkeologu kryesor i projektit.

Varri, i cili ëeshtë nëntë metra me gjashtë metra (29 ft me 19 ft), është zbulimi i parë në Shqipëri i asaj që ekspertët besojnë se është vendi i prehjes së një personi të pasur, më madhështor se vendet e tjera të varrimit të gjetura në zonë.

Autoritetet lokale në Shqipëri, tashmë po planifikojnë ta shndërrojnë vendin në një atraksion turistik, ndërsa banorët u dyndën në zonë me të dëgjuar lajmin e zbulimit.

Javën e kaluar, ekipi i Nikollit përdori furça për të zbuluar skajet e gdhendura me hollësi të gurëve të bardhë të çatisë dhe mureve të varrit.

“Gjithashtu zbuluam një copë pëlhure të qëndisur me fije ari, gjë që konfirmon bindjen tonë se kemi të bëjmë me një anëtar të klasës së lartë.”

Gjetje të tjera përfshijnë pjata dhe thika qelqi.

Nikolli tha se varri ishte plaçkitur të paktën dy herë – një herë në antikitet dhe më vonë kur makineri të rënda u përdorën për të lëvizur një shkëmb masiv sipër dhomës.

Ai shpjegoi se emri i banorit ishte shkruar me shkronja greke, por mbante një kuptim latin, ndërsa një mbishkrim i dytë tregon se varri i ishte kushtuar perëndisë Jupiter.

Ekspertët ende nuk kanë deshifruar mbishkrime të tjera në gurët e gjetur aty pranë, të cilat besohet se i përkisnin një monumenti tjetër që tani është i rrethuar nga fusha misri dhe një gurore.

Rruga Press