SHBA-ja arreston qindra koreanë në fabrikën Hyundai – Koreja e Jugut shpërthen ndaj Uashingtonit

Presidenti i Koresë së Jugut, Lee Jae-myung, ka urdhëruar masa urgjente pas arrestimit të qindra qytetarëve koreanë gjatë një bastisjeje masive të autoriteteve amerikane në një fabrikë baterish të Hyundai Motor në shtetin e Xhorxhias.

Sipas ministrit të Jashtëm Cho Hyun, është ngritur një ekip i posaçëm për menaxhimin e situatës, ndërsa ai vetë ka paralajmëruar se mund të udhëtojë drejt Uashingtonit për bisedime urgjente. Bastisja e së enjtes, ku u arrestuan rreth 475 punëtorë – mbi 300 prej të cilëve shtetas koreanë sipas burimeve diplomatike – është cilësuar si operacioni më i madh i një lokacioni të vetëm në historinë e Departamentit amerikan të Sigurisë Kombëtare.

Ky zhvillim ka shkaktuar përplasje të reja në marrëdhëniet mes SHBA-së dhe Seulit, ndërkohë që dy vendet kanë mosmarrëveshje mbi një marrëveshje tregtare që përfshin rreth 350 miliardë dollarë investime koreane në SHBA.

“Për Korenë e Jugut, aktivitetet ekonomike të investitorëve tanë dhe të drejtat e ligjshme të qytetarëve tanë nuk duhet të cënohen padrejtësisht në kuadër të zbatimit të ligjit në SHBA,” tha zëdhënësi i ministrisë së Jashtme, Lee Jae-woong, duke konfirmuar se Seuli i ka përcjellë shqetësimet ambasadës amerikane.

Ndërkohë, kompanitë e përfshira dhanë reagime të kujdesshme. Hyundai Motor Group refuzoi të komentojë, ndërsa LG Energy Solution, që është bashkë-investitore në fabrikën në Georgia, konfirmoi se 47 punonjës të saj dhe rreth 250 kontraktorë u arrestuan. Kompania tha se po monitoron nga afër situatën dhe prioritet mbetet siguria e punonjësve.

Bastisja ndodh në një kohë kur Koreja e Jugut ka intensifikuar investimet në SHBA për të forcuar lidhjet tregtare dhe për të shmangur tarifat amerikane, përfshirë miliarda dollarë në fabrika të reja në industrinë e automjeteve elektrike.

Rruga Press