Manxhuka: Heqja e ndikimit të Beogradit nga institucionet nuk është populizëm, por domosdoshmëri

Zëdhënësi i Lëvizjes VETËVENDOSJE!, Arlind Manxhuka, ka reaguar duke krahasuar trajtimin e pakicave në Kosovë me praktikat në Kroaci, ku Kuvendi ka miratuar një ligj që kërkon heqjen e mbishkrimeve dhe pllakave të varrezave të luftës së viteve 1991-1995 që konsiderohen ofenduese dhe në kundërshtim me rendin kushtetues.

Manxhuka tha se, ndryshe nga Kroacia, Kosova ofron të drejta të avancuara për pakicat, përfshirë edhe atë që ai e quajti “superpakicë” – pakicën serbe, e cila gëzon privilegje institucionale si e drejta e shumicës së dyfishtë, që në praktikë funksionon si veto.

Sipas tij, këto privilegje nuk janë shfrytëzuar nga Serbia për të forcuar të drejtat e komunitetit serb, por për të sabotuar dhe penguar shtetësinë e Kosovës.

“Për t’u befasuar është reagimi i opozitës dhe qarqeve përreth saj, që sa herë ka përpjekje për të instaluar një mentalitet shtetndërtues, menjëherë kritikojnë qeverinë për populizëm, sikur Kosova po i hyn në hak Serbisë,” shkroi Manxhuka.

Ai shtoi se krahasimi i dy mentaliteteve, Kroacisë dhe Kosovës, tregon qartë dallimin: “Ne po kërkojmë diçka elementare, të heqim mashën e Beogradit nga Kryesia e Kuvendit, dhe akuzohemi për populizëm. Në fakt, problemi është se kemi ulur aq shumë ndër vite kërkesat, sa edhe ato elementare po duken cenuese.”

Rruga Press