Administrata Trump thotë se po shqyrton dosjet e 55 milionë njerëzve me viza amerikane

Administrata e presidentit Donald Trump tha të enjten se po rishikon më shumë se 55 milionë persona që kanë viza të vlefshme amerikane, për çdo shkelje që mund të çojë në deportim, pjesë e një përshkallëzimi të fushatës kundër të huajve të lejuar të qëndrojnë në Shtetet e Bashkuara.

Në një përgjigje me shkrim për agjencinë Associated Press, Departamenti i Shtetit tha se të gjithë mbajtësit e vizave në SHBA – përfshirë turistë nga shumë vende – i nënshtrohen një “kontrolli të vazhdueshëm”, me synim çdo tregues që mund t’i bëjë të papërshtatshëm për të hyrë ose për të qëndruar në Shtetet e Bashkuara.

Nëse gjendet një informacion i tillë, viza do të revokohet dhe, nëse mbajtësi ndodhet në SHBA, ai do të jetë subjekt i deportimit.

Që kur Trump mori detyrën, administrata e tij është fokusuar në deportimin e migrantëve ilegalë në SHBA, si edhe të mbajtësve të vizave studentore dhe të programeve të shkëmbimit. Gjuha e re e Departamentit të Shtetit sugjeron se procesi i verifikimit të vazhdueshëm – që zyrtarët e pranojnë se është i gjatë dhe kompleks – është shumë më i gjerë dhe mund të nënkuptojë se edhe ata që janë të aprovuar për të qëndruar në SHBA mund të humbasin lejen papritur.

Sipas Departamentit të Sigurisë Kombëtare, vitin e kaluar në SHBA ishin 12.8 milionë banorë me green card dhe 3.6 milionë persona me viza të përkohshme. Shifra prej 55 milionësh sugjeron se një pjesë e atyre që i nënshtrohen kontrollit ndodhen jashtë SHBA-së me viza turistike shumëhyrëse, tha Julia Gelatt, drejtoreshë e programit të politikës së emigracionit në Migration Policy Institute. Ajo vuri në dyshim vlerën e shpenzimit të resurseve për persona që mund të mos kthehen kurrë në SHBA.

Departamenti i Shtetit tha se po kërkon tregues të papërshtatshmërisë, përfshirë tejkalimin e afatit të vizës, aktivitet kriminal, kërcënime ndaj sigurisë publike, përfshirje në aktivitete terroriste ose mbështetje për organizata terroriste.

“Ne shqyrtojmë çdo informacion të disponueshëm si pjesë e verifikimit, përfshirë të dhënat e policisë ose emigracionit apo çdo informacion tjetër që del pas dhënies së vizës dhe që mund të tregojë një papërshtatshmëri të mundshme,” tha Departamenti.

Nuk ka më viza pune për shoferët e kamionëve

SHBA gjithashtu do të ndalojë dhënien e vizave pune për shoferët komercialë të kamionëve, tha të enjten në X Sekretari i Shtetit, Marco Rubio. Vendimi hyn në fuqi menjëherë.

Rubio tha se “rritja e numrit të shoferëve të huaj që drejtojnë kamionë të mëdhenj në rrugët e SHBA po rrezikon jetët e amerikanëve dhe po dëmton jetesën e shoferëve amerikanë.”

Administrata Trump muajt e fundit ka ndërmarrë hapa për të zbatuar kërkesën që shoferët e kamionëve të dinë të flasin dhe lexojnë anglisht, me qëllim rritjen e sigurisë rrugore pas incidenteve ku mungesa e gjuhës mund të ketë ndikuar në aksidente fatale.

Departamenti i Shtetit njoftoi më vonë se po pezullon përkohësisht përpunimin e këtyre vizave për të rishikuar “protokollet e kontrollit dhe verifikimit”.

“Sigurimi që çdo shofer në rrugët tona të përmbushë standardet më të larta është i rëndësishëm për mbrojtjen e jetesës së shoferëve amerikanë dhe për ruajtjen e një zinxhiri furnizimi të sigurt e rezistent,” tha Departamenti.

Eksperti Edward Alden, nga Council on Foreign Relations, tha se punëtorët e huaj kanë ndihmuar në adresimin e mungesës së fuqisë punëtore në sektorin e transportit.

“Ky veprim duhet parë si pjesë e një përpjekjeje të qëllimshme për të dekurajuar kompanitë amerikane dhe institucionet si universitetet dhe spitalet nga punësimi i punëtorëve të huaj. Pasojat ekonomike do të jenë shumë më të mëdha sesa thjesht revokimi i vizave në disa kategori pune,” shkroi ai.

Një zgjerim i madh i procesit të verifikimit

Administrata Trump ka shtuar në mënyrë të qëndrueshme kufizimet dhe kërkesat për aplikantët e vizave, duke përfshirë edhe intervistat e detyrueshme ballë për ballë. Rishikimi i të gjithë mbajtësve të vizave shihet si një zgjerim i madh i një procesi që fillimisht ishte fokusuar tek studentët me aktivitete të dyshimta politike, përfshirë ata me qëndrime pro-palestineze ose anti-izraelite.

Kontrolli i ri do të përfshijë llogaritë në rrjetet sociale, të dhënat e policisë dhe të emigracionit në vendet e origjinës, si dhe çdo shkelje ligjore në SHBA. Këtë vit janë futur edhe rregulla të reja që kërkojnë çaktivizimin e opsioneve të privatësisë në telefonat celularë dhe aplikacione gjatë intervistave për vizë.

Sipas Departamentit të Shtetit, që prej ditës së inaugurimit të Trump, janë revokuar më shumë se dyfish i vizave totale krahasuar me vitin e kaluar, përfshirë gati katërfish i vizave studentore.

Shumica dërrmuese e të huajve që kërkojnë të hyjnë në SHBA kanë nevojë për vizë, përveç qytetarëve të 40 vendeve – kryesisht europiane dhe aziatike – që përfitojnë nga programi Visa Waiver. Por pjesa më e madhe e botës, përfshirë Kinën, Indinë, Indonezinë, Rusinë dhe shumicën e Afrikës, nuk janë pjesë e këtij programi, gjë që i bën qytetarët e tyre të detyruar të aplikojnë për vizë.

Vetëm këtë javë, Departamenti i Shtetit tha se janë revokuar mbi 6,000 viza studentore, prej të cilave rreth 4,000 për shkelje ligjore dhe 200–300 për çështje të lidhura me terrorizëm.

Rruga Press