Muja: Media e lirë për të shpifur ndaj Qeverisë, e heshtur ndaj Devollit që la pa paga 1800 punëtorë

Deputeti i Kuvendit të Kosovës, Armend Muja, ka reaguar lidhur me situatën financiare të Radio Televizionit të Kosovës (RTK), duke akuzuar mediat për qasje të dyfishta në raportimin e tyre.

Muja tha se prej dy javësh RTK-ja nuk ka mjete financiare, pasi buxheti i saj nuk mund të alokohet pa miratimin paraprak të komisionit parlamentar – diçka e pamundur aktualisht për shkak të bllokimit të konstituimit të Kuvendit nga opozita, e cila po bojkoton votimet.

Sipas tij, megjithëse Qeveria nuk ka kompetenca mbi buxhetin e RTK-së, gjatë kësaj periudhe ajo është kritikuar nga portale, analistë dhe Asociacioni i Gazetarëve të Kosovës (AGK).

Muja e krahasoi këtë me rastin e Telekomit të Kosovës, i cili për tetë muaj rresht kishte llogaritë e bllokuara nga kompania Z-Mobile/Devolli, duke lënë 1,800 punëtorë pa paga. Ai theksoi se gjatë asaj kohe nuk është bërë asnjë kritikë publike nga mediat apo analistët ndaj kompanisë private.

“Kjo flet më së miri për lirinë e medias në Kosovë. Ndaj Qeverisë janë të lira edhe të shpifin, kurse ndaj oligarkëve ka vetëcenzurë maksimale,” deklaroi Muja.

Rruga Press