BE-ja paralajmëron Kinën: Marrëdhëniet tregtare duhet të balancohen, ndryshe rrezikohen eksportet kineze

Presidentja e Komisionit Evropian, Ursula von der Leyen, ka paralajmëruar se Bashkimi Evropian nuk do të mund të mbajë të hapura tregjet e tij për mallrat kineze nëse Pekini nuk ndërmerr hapa për të balancuar marrëdhëniet tregtare mes dy palëve.

“Evropa i mban tregjet e saj të hapura për mallrat kineze, ndryshe nga tregjet e tjera. Por kjo hapje nuk po kthehet me të njëjtën masë nga Kina”, deklaroi von der Leyen në një konferencë pas samitit me presidentin kinez Xi Jinping dhe kryeministrin Li Qiang në Pekin.

Ajo theksoi se deficiti tregtar i BE-së me Kinën është dyfishuar në dekadën e fundit, duke arritur mbi 300 miliardë euro. “Kemi arritur në një pikë kthese. Tregtia duhet të bëhet më e balancuar,” tha ajo.

Pritshmëritë për përparim ishin të ulëta para samitit, me çështje të pazgjidhura si tarifat antidumping që BE vendosi vitin e kaluar mbi makinat elektrike kineze. Ndërkohë, të dyja palët vazhdojnë të mbajnë të mbyllura tregjet publike për tenderët e pajisjeve mjekësore.

Von der Leyen shtoi se në takim u diskutua edhe për parimin e reciprocitetit në aksesin në treg dhe se të dyja palët ranë dakord të punojnë për “zgjidhje konkrete” në fushën e prokurimeve publike.

Në lidhje me mbikapacitetin prodhues – veçanërisht për produkte të subvencionuara si çeliku, panelet diellore apo bateritë – von der Leyen tha se Kina ka treguar gatishmëri për të ulur suficitet e saj tregtare duke rritur konsumin e brendshëm. “Pa përparim, do të jetë shumë e vështirë për BE-në të ruajë hapjen e saj,” paralajmëroi ajo.

Për sa i përket lëndëve të para kritike ku Kina ka dominim, von der Leyen e vlerësoi përpjekjen e Pekinit për të përshpejtuar dërgesat dhe për të zhvilluar mekanizma mbështetës për bizneset evropiane që kanë nevojë për këto minerale.

Rruga Press