Rutte: Marrëveshja e armëve dërgon sinjal të fortë për unitetin SHBA–Evropë ndaj Kremlinit

Sekretari i Përgjithshëm i NATO-s, Mark Rutte, ka deklaruar se vendimi për shitjen e armëve nga Shtetet e Bashkuara drejt vendeve të NATO-s për t’u shpërndarë në Ukrainë është një sinjal i qartë për Vladimir Putinin: SHBA dhe Evropa janë të bashkuara dhe të vendosura për të mbështetur Ukrainën.

Në një intervistë për Fox News, pas takimit me presidentin amerikan Donald Trump në Uashington, Rutte tha se ky vendim konfirmon seriozitetin e administratës amerikane në përballjen me agresionin rus.

“Nëse do të isha në Kremlin sot, nuk do të isha shumë i lumtur,” u shpreh ai. “Ky është një sinjal i qartë se presidenti Trump është serioz. Ai dëshiron paqe dhe e urren faktin që kaq shumë njerëz humbasin jetën në Ukrainë.”

Sipas Rutte, vendimi për shitjen e armëve përmes aleatëve të NATO-s përbën një moment të rëndësishëm për Evropën, veçanërisht në kohën kur negociatat për paqe me Moskën janë në ngërç.

Pas takimit me Trump më 14 korrik, Rutte konfirmoi se është arritur një marrëveshje për mbështetjen me armatim ndaj Ukrainës dhe vlerësoi përpjekjet e presidentit amerikan për të thyer bllokimin diplomatik me Putinin. Ai theksoi se është jetike që Kremlini të marrë një mesazh të qartë për unitetin transatlantik dhe gatishmërinë për të bërë gjithçka që duhet për të mbështetur Kievin në luftën për mbijetesë.

Rruga Press