Ndërtimi i rrugës nacionale N25/ Miratohet vendimi për shpronësim të pronave

 Ministri i Mjedisit, Planifikimit Hapësinor dhe Infrastrukturës, Liburn Aliu, njoftoi se është miratuar vendimi për shpronësim të pronave ta paluajtshme që preken nga realizimi i projektit për zgjerim të rrugës nacionale N25, segmenti QMI-Lipjan.

Vendimi është miratuar në mbledhjen e sotme të qeverisë, teksa Aliu thotë se është për interes publik.

Ministri ka paralajmëruar se së shpejti do të shpallet edhe njoftimi tenderues për ndërtimin e kësaj rruge, e cila do të shndërrohet nga dy, në katër korsi.

“Nuk ka më projekte që nisnin e nuk përfundonin kurrë e as projekte që nisnin mbrapshtë e shtrohej asfalt pa shpronësim e projekt”, shkroi Aliu.

Ky është postimi i tij i plotë, në Facebook:

Miratohet Vendimi për shpronësim për interes publik të pronave të paluajtshme të cilat preken nga realizimi i projektit:

“Zgjerimi i Rrugës Nacionale N25″,  segmenti QMI – Lipjan.

Së shpejti do të shpallet edhe njoftimi për tenderim për ndërtimin e kësaj rruge të rëndësishme, e cila sipas projektit do shëndrrohet nga dy në katër korsi.

Nuk ka më projekte që nisnin e nuk përfundonin kurrë e as projekte që nisnin mbrapshtë e shtrohej asfalt pa shpronësim e projekt.

Rruga Press