NATO-ja nis të hënën stërvitjet bërthamore, njofton Rutte

NATO-ja do të fillojë stërvitjen e saj vjetore bërthamore të hënën, ka bërë të ditur të enjten sekretari i Përgjithshëm i aleancës, Mark Rutte.

Avionët luftarakë F-35A dhe bombarduesit B-52 do të jenë në mesin e rreth 60 avionëve nga 13 vende që do të marrin pjesë në stërvitjen “Steadfast Noon”, të organizuar nga Belgjika dhe Holanda. 

“Në një botë të pasigurt është jetike që të testojmë mbrojtjen tonë dhe të forcojmë mbrojtjen tonë në mënyrë që kundërshtarët tanë të dinë se NATO është gati dhe është në gjendje t’i përgjigjet çdo kërcënimi”, ka thënë Rutte në Londër pas takimeve me kryeministrin Keir Starmer dhe presidentin ukrainas, Volodymyr Zelensky.

“E gjithë stërvitja do të fokusohet në Mbretërinë e Bashkuar, Detin e Veriut, por edhe Belgjikë dhe Holandë”, ka shtuar ai.

Rreth 2,000 personel ushtarak që marrin pjesë në stërvitje do të simulojnë misione në të cilat avionët luftarakë mbajnë koka bërthamore të SHBA-së, kanë bërë të ditur zyrtarët, raporton Reuters.

Stërvitja do të fillojë të hënën dhe do të zgjasë për rreth dy javë, sipas zyrtarëve nga aleanca ushtarake transatlantike prej 32 anëtarësh.

Putini ka paralajmëruar vazhdimisht Perëndimin për pasojat e mundshme bërthamore që nga pushtimi i plotë i Ukrainës nga Rusia në vitin 2022.

Ai deklaroi muajin e kaluar se Rusia mund të përdorë armë bërthamore nëse goditet me raketa konvencionale, dhe se Moska do ta konsideronte çdo sulm ndaj saj të mbështetur nga një fuqi bërthamore, si një sulm të përbashkët.

Zyrtarët e NATO-s theksuan se stërvitja e aleancës nuk ishte një përgjigje ndaj ndonjë deklarate të fundit nga Moska dhe se stërvitjet janë zhvilluar çdo vit për më shumë se një dekadë.

Rruga Press