Bislimi: Serbia refuzoi të hynte në takim me agjendën e dakorduar

Kryenegociatori i Kosovës, Besnik Bislimi, ka deklaruar është mister se si s’ka pasur takim trilaterial në Bruksel, ndonëse sipas tij, ftesa e të dërguarit të BE-së, Miroslav Lajçak, paralajmëronte se do të kishte takim të tillë.

Ai ka thënë të martën se pala serbe e ka refuzuar trilaterial nga agjenda, duke kërkuar “futjen e temave të saj të cilat janë për konsum politik”.

“Edhe për ne është pak mister sepse ftesa ka qenë shumë e qartë e zotit Lajçak që do të ketë së pari të ketë takim bilateral dhe kanë qenë të propozuara temat apo agjenda e takimit bilateral, pastaj është thënë që në takimin trilateral do të diskutohet rruga përpara në marrëveshjen e normalizimit dhe mund të vendosen edhe tema të tjera nëse ka dakordim mes dy palëve. Ne jemi pajtuar me këtë ftesë, e kemi konfirmuar edhe pjesëmarrjen në takimin trilateral, por si duket Serbia pastaj ka refuzuar të hyjë me atë agjendë dhe ka kërkuar futjen e temave të saj të cilat janë për konsum politik, çka ne nuk kemi qenë dakord”, ka deklaruar Bislimi.

Sipas tij, në ftesë thuhej se temat e tjera mund të futen në diskutim vetëm me dakordimin e palëve, e “rrjedhimisht trilateral nuk ka mundur të kushtëzohet me pranimin ose jo të propozimeve të palës tjetër”.

Ai ka shtuar se kushtëzimi i agjendës “duket ka qenë që Serbia s’ka pranuar të hyjë në takim”.

“Ne kemi kërkuar edhe sot nga zoti Lajçak që të demantojë raportimet që të dyja palët s’kanë qenë të gatshme për takim trilateral për arsye se ne në plotni e kemi ndjekë ftesën e Lajçakut. Ka qenë Serbia që s’ka pranuar të hyjë, për aq kohë sa nuk janë pranuar propozimet e saj me temat që sot kanë të bëjnë me konsum politik në Serbi”, është shprehur Bislimi.

Ai bëri të ditur se kanë diskutuar një varg çështjes, por kryesorja ka qenë rruga drejt zbatimit të Marrëveshjes Bazike dhe Aneksit të Ohrit. Bislimi bëri të ditur se kanë folur edhe për temën e telekomunikacionit, pasi më parë kanë njoftuar Brukselin zyrtar “për shkeljet që po i bën Serbia të marrëveshjes duke interferuar në frekuenca brenda territorit”.

“Po ashtu edhe për temën e dakorduar që në një të ardhme të bisedohet për shërbimet postare. Kishte ftuar ekspertë të komisionit që na treguan direktivat e Komisionit Evropian dhe këto ishin për ne jashtëzakonisht të vlefshme. Nga këto prezantime e pamë të qartë se në fakt, sipas interpretimit të tyre, Kosova është në plotëni në rrafshin e shërbimeve postare, në harmoni me direktivat e BE-së, përderisa Serbia vetëm pjesërisht. Po ashtu thonë se askund në BE nuk tolerohen veprime apo operime ilegale të kompanive që bëjnë shërbime postare dhe rrjedhimisht ka qenë shumë e denjë nga ana jonë që të mbyllet e njëjta”, ka thënë tutje Bislimi.

Duke komentuar masat dhe kërkesat e propozuara nga presidenti i Serbisë, Aleksandar Vuçiq, për Kosovën, Bislimi ka thënë se më shqetësuese se konferenca e ka parë mosreagimin ndërkombëtar.

“Ajo që për mua ka qenë brengosëse, jo përmbajtja, raportimi apo konstatimet e tij, por fakti që këto konstatime të tij nuk kanë hasur në brengë apo reagim të ashpër nga Komisioni Evropian apo nga Bashkimi Evropian, por ajo që është zgjedhur është që nga një takim 40-50 minuta të zgjidhen dy minuta që mund të interpretohen pozitivisht dhe i gjithë reagimi është marrë me ato dy minuta e jo me përmbajtjen shumë të rrezikshme të këtij adresimi”, ka thënë tutje ai.

“Për mua është e pakapshme që Bashkimi Evropian nuk e sheh si brengosëse që të gjitha konstatimet kanë si pikënisje në narrativë artificiale dhe të pavërtetë mbi zhvillimet në Kosovë. Për informimin tuaj, edhe Marrëveshja për MTS-in dhe ajo për Elektroseverin e ka shumë të qartë të stipuluar që gjithçka zhvillohet në bazë të kornizës ligjore të Kosovës. Zoti Vuçiq me këto marrëveshje e ka pranuar që nga Merdarja e këtej është zonë ku ka kornizë tjetër ligjore. Ku ka zero ingerenca të Serbisë dhe pastaj gjithçka që ndodh brenda kësaj zone bëhet sipas kornizave ligjore të Republikës së Kosovës. Kurse pastaj thotë le të kthehen policët, le të kthehen gjykatësit, që në fakt është ftesë për bashkësinë ndërkombëtare dhe Kosovën t’i korrigjojnë dështimet e tij politike. Mendoj se kjo është arsyeja me të cilat është dashur të merret BE-ja dhe jo me ftesën e tij që serbët të marrin pjesë në zgjedhje. Ai këtë ftesë e ka bërë edhe para zgjedhjeve të prillit, por e dimë se si ka përfunduar”, ka thënë Bislimi.

Rruga Press