Ukraina sulmon Moskën me dronë

Ukraina ka sulmuar Moskën të mërkurën me të paktën 11 dronë.

Zyrtarët rusë kanë thënë se ishte një nga sulmet më të mëdha me dronë në kryeqytet, që nga fillimi i luftës në Ukrainë, në shkurt të vitit 2022.

Lufta e Ukrainës është përshkallëzuar më 6 gusht kur Ukraina dërgoi mijëra ushtarë në rajonin perëndimor Kursk të Rusisë, raporton Reuters.

Ministria ruse e Mbrojtjes ka pretenduar se shkatërroi 45 dronë mbi territorin rus, duke përfshirë 11 mbi rajonin e Moskës, 23 mbi rajonin kufitar të Bryanskut, gjashtë mbi rajonin Belgorod, tre mbi rajonin Kaluga dhe dy mbi rajonin Kursk.

Disa nga dronët u shkatërruan mbi qytetin e Podolskut, ka pretenduar kryebashkiaku i Moskës, Sergei Sobyanin. Podolsk është rreth 38 km në jug të Kremlinit.

“Kjo është një nga përpjekjet më të mëdha për të sulmuar Moskën me dronë”, ka thënë Sobyanin në aplikacionin e mesazheve Telegram në orët e para të së mërkurës.

Rruga Press