Harris siguron mjaftueshëm mbështetje nga delegatët për të qenë kandidate e demokratëve për Presidente të SHBA-së
Zëvendës-presidentja Kamala Harris ka marrë mbështetjen e mjaft delegatëve demokratë për t’u bërë kandidatja e partisë për president, raporton partneri amerikan i BBC-së, CBS News.
Disa të dhëna nga Associated Press të hënën në mbrëmje thanë se zonja Harris kishte marrë miratimin e më shumë se 1,976 delegatëve të nevojshëm për të fituar nominimin në raundin e parë të votimit.
Dhe Harris tha se ishte “krenare” që kishte siguruar “mbështetje të gjerë” dhe mezi priste të pranonte zyrtarisht nominimin, përcjell Telegrafi.
Delegatët janë njerëz që zgjidhen për të përfaqësuar zonën e tyre zgjedhore në Konventën Kombëtare Demokratike (DNC), ngjarja kryesore e emërimit të partisë.
Ndërkohë delegacionet nga të paktën 27 shtete kanë lëshuar deklarata të delegacioneve të tyre të plota në mbështetje të zonjës Harris, sipas CBS.
Kjo vlerësohet se është një tregues i mbështetjes së madhe për zonjën Harris pasi presidenti Joe Biden u tërhoq nga gara të dielën.
Që nga shpallja e tërheqjes nga Biden, miliona dollarë donacione janë derdhur në fushatën e saj dhe demokratët kryesorë janë rreshtuar për të mbështetur ofertën e saj si kandidate demokrate.
Duke folur me stafin në selinë e fushatës së saj në Wilmington, Delaware, të hënën në mbrëmje, zonja Harris i tha stafit të fushatës: “Kemi 106 ditë deri në ditën e zgjedhjeve dhe në atë kohë, kemi një punë të vështirë për të bërë”.
Ajo vuri në dukje gjithashtu arritjet e zotit Biden, duke thënë se koha e saj duke shërbyer si zëvendës-presidente e tij ishte “një nga nderimet më të mëdha të jetës sime”.
Përpara se zonja Harris të dilte në skenë, Biden bëri komentet e tij të para që nga largimi nga zgjedhjet e 2024 përmes telefonatës ndërsa ishte izoluar pas kontraktimit me Covid-19.
Ai falënderoi ndihmësit dhe u tha atyre që të “përqafonin” zonjën Harris sepse “ajo është më e mira”.
“E di që lajmet e djeshme ishin befasuese dhe të vështira për t’u dëgjuar, por ishte gjëja e duhur për t’u bërë”, u tha zoti Biden.
Rruga Press