Estonia: Nuk kemi plan B nëse Ukraina bie

Estonia është e bindur se sapo të përfundojë lufta në Ukrainë, presidenti rus Vladimir Putin do ta kthejë vëmendjen në shtetet baltike, duke kërkuar që shtetet si Estonia t’i kthejë nën kontrollin e Moskës.

Për ta ndaluar këtë mundësi, qeveria estoneze ka derdhur para dhe armë në luftën e Ukrainës.

“Nëse çdo shtet i NATO-s do ta bënte këtë, Ukraina do të fitonte”, ka thënë kryeministrja e Estonisë, Kaja Kallas.

Por, Ukraina nuk është duke fituar.

Në mungesë të artilerisë, municionit, mbrojtjes ajrore dhe mbi të gjitha trupave, Ukraina po e ka të vështirë të përballet me armatimet e Rusisë dhe sulmet në kufij.

Kallas është pyetur cili do të jetë plani B i Estonisë nëse Ukraina e humb luftën.

“Nuk kemi plan B për një fitore ruse”, është përgjigjur ajo, “sepse atëherë ne do të ndalonim të fokusohemi në planin A” – për ta ndihmuar Ukrainën ta shtyjë prapa pushtimin rus.

“Nuk duhet t’i jepemi pesimizmit. Fitorja e Ukrainës nuk është vetëm për territor. Nëse Ukraina i bashkohet NATO-s, edhe nëse nuk është i gjithë territori, atëherë ajo është fitore sepse do të vendoset nën ombrellën e NATO-s”, ka theksuar ajo.

Rruga Press