Qoku i reagon BDI-së: Jemi lodhur nga këta që shqiptarizmin e kanë punë personale, ndërsa sllavizmin detyrë qeveritare
Kandidati për president në Maqedoni të Veriut nga radhët e BDI-së, Bujar Osmani ditëve të fundit po mundohet të pastrojë imazhin e tij pro-serb e pro-sllav duke bërë deklarata që manipulojnë realitin politik e opinionin publik.
Në një deklarim për një media maqedonase, Bujar Osmani, Ministër i Jashtëm i MV-së, deklaroi se qendrimet personale të tij nuk ishin edhe qëndrime të Qeverisë, duke iu referuar kështu heshtjes së Qeverisë së MV-së për sulmin terrorist serb në Banjskë të Kosovës.
Me një deklaratë të tillë Osmani pranon të paktën një nga dy të vërtetat që implikohen, ai ose është dakort me Qeverinë e tij në pozicionimin pro-serb, pra pro-terrorist dhe nuk e pranon, ose ai shërben me dëshirë në një Qeveri që shkon kundër interesave të shqiptarëve, dhe prap nuk e thotë. Në të dyja rastet ai gënjen dhe nuk e thotë të vertetën, dhe tenton tani të manipulojë opinionin publik, a thua se brenda Qeverisë së Ballkanit të Hapur, ndaj së cilës ai është shumë besnik, ka pasur çarje dhe debate në lidhje me këtë pozicionim.
Ndaj këtij manipulimi ka reaguar edhe kandidati për deputet nga radhët e LVV-së në zgjedhjet e përgjithshme në RMV, Bekim qoku i cili shkruan se “jemi lodhur nga këta që shqiptarizmin e kanë punë personale, ndërsa sllavizmin detyrë qeveritare“.
“Gati 7 muaj pas sulmit terrorist në Banjskë, e përkundër të gjitha fakteve dhe provave që Qeveria e Kosovës i ka bërë publike, Bujar Osmani paska vendosur që tani, gjatë fushatës zgjedhore, ta fajësojë Serbinë. Menjëherë pas Banjskës, Osmani tha se Maqedonia duhet ta rimendojë pjesëmarrjen e saj në Open Balkan. Por në 5 tetor përgënjeshtroi veten, duke thënë se komentet e tij ishin qëndrime personale, ama jo të qeverisë. Jemi lodhur nga këta që shqiptarizmin e kanë punë personale, ndërsa sllavizmin detyrë qeveritare“, shkruan Qoku në llogarinë e tij në Facebook.
Maqedonia e Veriut shkon në zgjedhje presidenciale të mërkurën e 24 prillit, ku nga radhët e shqiptarëve kandidojnë Arben Taravari nga fronti opozitar shqiptar VLEN, dhe Bujar Osmani nga radhët e partisë së përhershme të pushtetit BDI.
Rruga Press