Pamjet/ Rusët shkatërrojnë termocentralin që furnizon me energji Kievin

Një termocentral i madh pranë Kievit u shkatërrua plotësisht nga sulmet ruse këtë të enjte. Termocentrali Trypillya ishte ofruesi më i madh i energjisë elektrike për 3 rajone, duke përfshirë Kievin. “Shkalla e shkatërrimit është e tmerrshme” – tha kryetari i Centrenergo, Andriy Hota.

Rusia ka kohë që po shënjestron qëllimisht dhe sistematikisht sistemin energjetik të Ukrainës. Hota i tha BBC-së se sulmet e së enjtes shkatërruan “transformatorin, turbinat, gjeneratorët. Ata e shkatërruan 100%”.

Një zjarr shpërtheu në zonën e turbinave të uzinës që ndodhet 50 km në jug të Kievit pas një sulmi ajror në shkallë të gjerë. Shefi i Centrenergo tha se uzina ishte në shënjestër të raketave të shumta. Stafi në turn ishte në gjendje të shpëtonte, tha ai, sepse vrapuan për t’u mbrojtur sapo goditi droni i parë. Banorëve iu kërkua të mbyllnin dritaret, të karikonin të gjitha pajisjet e tyre dhe të ruanin rezervat e ujit.

Më shumë se 80 raketa dhe dronë shënjestruan disa vende në të gjithë Ukrainën në orët e para të së enjtes. Shumë shënjestruan infrastrukturën energjetike dhe pothuajse një e treta ia dolën të kalojnë përmes mbrojtjes ajrore të Ukrainës. Disa orë më vonë, Centrenergo konfirmoi se uzina e saj Trypillya ishte nxjerrë jashtë përdorimit. Hota tha se i gjithë kapaciteti gjenerues i kompanisë së tij në Ukrainë tani është shkatërruar.

Uzinat e Kharkiv dhe Trypillya prodhonin rreth 8% të energjisë elektrike të vendit. Termocentrali Trypillya u dha energji tre rajoneve qendrore Zhytomyr, Cherkasy dhe Kyiv. Shkatërrimi i uzinës Trypillya nuk do të ishte një çështje kritike për Ukrainën gjatë verës, besonte ai, megjithëse nga dimri do të bëhej një “problem gjigant”. 

Rruga Press