Osmani: Luftëtarët e UÇK-së realizuan ëndrrën shekullore të shqiptarëve

Kuvendi i Kosovës ka mbajtur seancë solemne në shënimin e 25-vjetorit të Betejës së Koshares. Deputetët e kanë nisur seancën me një minutë heshtje. 

Presidentja e Kosovës, Vjosa Osmani, ka thënë se Beteja e Koshares ishte pikë kthese për popullin kundër regjimit gjenocidal serb. Ajo ka theksuar se luftëtarët e kësaj beteje dhanë gjithçka për atdheun dhe realizuan ëndrrën shekullore. 

“25 vjet më parë qëndruam në një udhëkryq ekzistencial të krijuar nga padrejtësia e tirania e një regjimi gjenocidal. Sot jemi këtu për të nderuar guximin dhe përkushtimin e vajzave e djemve të Kosovës. Kësaj rezistence të armatosur i parapriu rezistenca paqësore e udhëhequr nga presidenti historik Ibrahim Rugova. Ishte më shumë se rezistencë ishte kryengritje civile për lirinë themelore. Filozofia e mbrojtjes së pragut të shtëpisë u shndërrua në nevojë të mbrojtjes së përgjithshme. Në këtë betejë, luftëtarë shembullorë si Agim Ramadani, Rrustem Berisha, Anton Quni, arritën të realizojnë ëndrrën shekullore thyerjen e kufirit shqiptaro-shqiptar… luftëtarët e UÇK-së në Betejën e Koshares dëshmuan shpirtin vetëmohues për t’i dhënë gjithçka atdheut edhe gjënë më sublime të tyre, jetën”, ka thënë presidentja para deputetëve. 

Osmani ka shtuar se institucionet vazhdojnë përkushtimin për ta forcuar shtetin. 

“Teksa kujtojmë me nderimin më të thellë luftëtarët e Brigadës Agim Ramadani riafirmojmë përkushtimin që të punojmë fort për Republikën e Kosovës siç e deshën ata që ranë. Lavdi heronjve të Brigadës Agim Ramadani”, ka përfunduar Osmani.

Rruga Press