Suedia sot pritet të bëhet anëtarja e 32-të e NATO-s

Pas dy shekujsh politikë neutrale, Suedia sot pritet të bëhet edhe zyrtarisht anëtarja e 32-të e NATO-s, një hap i madh për një vend që dikur ishte i kujdesshëm për të mos zemëruar Rusinë.

Kryeministri suedez Ulf Kristersson sot në Uashington do t’ia dorëzojë në mënyrë ceremoniale dokumentet e ratifikimit sekretarit të Shtetit, Antony Blinken, pas betejës së gjatë për të siguruar mbështetjen e nevojshme nga të gjithë anëtarët e NATO-s.

Kristersson pritet që më vonë gjatë ditës të marrë pjesë në fjalimin vjetor të presidentit Joe Biden, i cili po përpiqet të bindë partinë rivale republikane që të miratojë ndihmën e re për Ukrainën.

Flamuri i Suedisë pritet të ngrihet të hënën në selinë e Aleancës së Traktatit të Atlantikut të Veriut në Bruksel.

Rusia është zotuar për “kundërmasa” për hyrjen e Suedisë në NATO, veçanërisht nëse trupat dhe mjetet e aleancës vendosen në vend.

Suedia dhe Finlanda, të dyja të ndërthurura ushtarakisht me Shtetet e Bashkuara dhe anëtarët e Bashkimit Evropian, historikisht janë larguar nga anëtarësimi zyrtar në NATO, i formuar në Luftën e Ftohtë për t’u bashkuar kundër Bashkimit Sovjetik.

Suedia nuk është përfshirë në një luftë, duke përfshirë Luftën e Dytë Botërore, që nga konfliktet e Napoleonit të fillimit të shekullit të 19-të.

Por Suedia dhe Finlanda nisën fushatën për anëtarësim në NATO pasi Rusia pushtoi Ukrainën në vitin 2022. Finlanda u bë anëtare më 4 prill të vitit 2023.

Rruga Press