Kamberi: Dinari, proces i përballjes me strukturat e paligjshme në Kosovë

Lidhur me reagimin e valutës së dinarit në Kosovë, analisti Belgëzim Kamberi tha se është një reflektim i krizës së zbatimit të marrëveshjes për normalizimin e marrëdhënieve në mes të Kosovës e Serbisë.

“Çështja e dinarit reflekton krizën e zbatimit të marrëveshjes në normalizimin marrëdhënieve në mes të Kosovës e Serbisë e që kishte edhe çështjen e integrimit të serbëve në institucionet e Kosovës në kuadër të dialogut Kosovë- Serbi”, tha Belgëzim Kamberi në një intervistë në RTK.

Ai më tej shtoi se, sikurse çështja e targave, pastaj e dinarit, si dhe intervenimet e Policisë së Kosovës në pezullimin e veprimtarive të të ashtuquajturave komuna paralele të serbëve në Kosovë, është një proces i përballjes së strukturave të paligjshme të Serbisë në Kosovë.

Kamberi tutje sqaroi se e gjithë kjo po ndodhë në një kohë kur është arritur një marrëveshje për normalizimin e marrëdhënieve, që do të duhej të zbatohej në koordinim edhe me ndërkombëtarët e në kuadër të dialogut, por që institucionet e Kosovës këtë po e zbatojnë , sikundër u shpreh ai, përmes një proces vetanak.

“Edhe çështja e dinarit ka të bëjë me sovranizimin monetar midis Kosovës e Serbisë, për zbatimin e saj në Kosovë”, deklaroi Kamberi.

Ai më tej theksoi se dialogu kishte një ecje përpara në fundin e vitit që lamë prapa, por që tani përsëri dialogu është futur në një krizë, pikërisht kur tani pritet të mbahen zgjedhjet në BE.

Rruga Press