Këlliçi: SPAK të anulojë kontratën e inceneratorit të Tiranës

Anëtari i Kryesisë së Rithemelimit të Partisë Demokratike, Belind Këlliçi këkroi sot nga SPAK që të anulojë kontratën e inceneratorit të Tiranës.

Këlliçi u shpreh se, tashmë janë bërë 4 muaj që komunikon në mënyrë intensive me SPAK për këtë çështje, të cilën e cilësoi si aferën e shekullit.

“Tashmë kemi hyrë në muajin e katërt të komunikimit tonë intensiv me strukturën e SPAK, në lidhje me aferën e shekullit, atë të Inceneratorit fantazmë të Tiranës”, u shpreh Këlliçi.

“Kemi hyrë tashmë në vitin e katërt të hetimeve për këtë çështje, kemi depozituar pranë SPAK me qindra faqe dhe dokumente, ndaj sërish sot i bëjmë thirrje SPAK të veprojë në mënyrë urgjente duke ndalur këtë vjedhje, duke anuluar këtë kontratë korruptive”, tha ai ndër të tjera.

“Nga sot përgjegjës për çdo qindarkë abuzim me këtë kontratë, janë dhe prokurorët të cilët me mosveprimet e tyre, po e lejojnë këtë vjedhje flagrante të ndodhë”, theksoi Këlliçi.

Rruga Press