Zhdukja e kreut të opozitës ruse është plan zgjedhor i Putinit, jo rastësi, thotë ish-ministri rus

Udhëheqësi i opozitës ruse Alexey Navalny mungoi përsëri në dy seancat e planifikuara gjyqësore të kryera përmes videolidhjes të premten, sipas një deklarate nga ekipi i tij.

Ekipi i Navalny thotë se politikani i shquar tani është i zhdukur prej 17 ditësh,  pasi nuk dihet ku ëhstë dërguar.

“Sot Alexey duhej të kishte dy seanca. Ai përsëri nuk u soll në seancë. Navalny nuk është mbajtur kurrë  fshehur për kaq shumë kohë, “tha ekipi i Navalny në një postim në Telegram.

Kohëzgjatja e paprecedentë e mungesës së Navalny nga publiku ka shkaktuar shqetësime për mirëqenien dhe sigurinë e tij.

Ndihmësit e Navalny-t kanë bërë një thirrje për informacion, duke ofruar një shpërblim në kriptomonedhë për detaje të plota dhe të besueshme rreth vendndodhjes ose gjendjes të tij aktuale.

I pyetur në mënyrë të përsëritur javën e kaluar për mungesën e Navalny, Kremlini u tha gazetarëve se nuk kishte “as qëllimin dhe as aftësinë për të monitoruar fatin e të burgosurve dhe procesin e qëndrimit të tyre në institucionet përkatëse”.

‘Nuk është rastësi’

Vladimir Milov, një ish-zëvendës ministër rus i Energjisë dhe tani një këshilltar i Navalny-t, i tha Richard Quest të CNN se koha e zhdukjes së Navalny-t nuk ishte “rastësi”, duke vënë në dukje njoftimin e presidentit rus Vladimir Putin për qëllimin e tij për të kandiduar sërish në zgjedhjet e Rusisë në mars 2024 – një lëvizje që mund ta bëjë atë të mbajë pushtetin të paktën deri në vitin 2030.

“Mendoj se është një taktikë e qëllimshme. Nuk është rastësi që Navalny u zhduk pikërisht në momentin kur u shpallën të ashtuquajturat zgjedhje të rreme presidenciale dhe që Putini njoftoi se do të kandidonte përsëri”, tha Milov.

“Putini është me të vërtetë i gatshëm të tregojë se do të hyjë në Kremlin për një mandat tjetër përmes frikësimit, represionit, përmes presionit ndaj shoqërisë dhe kjo është qartësisht një shantazh për të gjitha forcat opozitare,” shtoi Milov.

Përpara intervistës, CNN kontaktoi Shërbimin e Burgjeve Ruse të premten, duke kërkuar informacion për vendndodhjen e Navalny.

Milov i tha Quest të premten se pavarësisht përpjekjeve të tij për të gjetur vendndodhjen e Navalny, “deri më tani, nuk ka asnjë përgjigje”.

Milov tha se kolegët e tij duhej të dërgonin kërkesa zyrtare dhe me shkrim në institucionet e paraburgimit në Rusi për të kërkuar informacion mbi vendndodhjen e Navalny, një proces që ai e përshkroi si një “të lodhshëm” dhe që “kërkon kohë dhe përpjekje”.

“Kolegët e mi kanë bombarduar të gjitha institucionet e njohura të paraburgimit në Rusi në përpjekje për të gjetur Navalny në të gjithë vendin,” tha Milov.
Ai shtoi se kanë marrë përgjigje nga disa qendra paraburgimi që thanë se Navalny nuk ishte i pranishëm në to, kurse disa nga objektet e tjera nuk i janë përgjigjur ende pyetjeve.

Rruga Press