Blinken në Aman, takohet me ministrat e Jashtëm të Lindjes së Mesme, pritet t’i kërkohet armëpushim në Gaza

Sekretari amerikan i Shtetit Antony Blinken është nisur sot drejt Amanit ku do të takohet me ministrat e Jashtëm të Lindjes së Mesme. Kjo është hera e tretë që Blinken viziton rajonin që nga sulmi i 7 tetorit në Izrael.

Në fokus të bisedimeve në samit do të jetë konflikti në Izrael dhe Gaza.

Ministria e Jashtme e Jordanisë njoftoi të premten se ministri i jashtëm Ayman Safadi do të mbledhë homologët e tij nga Arabia Saudite, Emiratet e Bashkuara Arabe, Egjipti dhe Katari, si dhe Sekretarin e Komitetit Ekzekutiv të Organizatës për Çlirimin e Palestinës, të cilët më pas do të takohen si grup me Blinken.

Pritet që gjatë samitit, të dërguarit të SHBA-së t’i kërkohët një armëpushim i menjëhershëm në Gaza. Më herë gjatë ditës së sotme, Sekretari amerikan i Shtetit u takua me kryeministrin e përkohshëm të Libanit, Najib Mikati. 

Vizita e Blinken në Aman vjen pas udhëtimit të tij në Tel Aviv ku u takua me zyrtarë izraelitë, përfshirë kryeministrin Benjamin Netanyahu, dhe ku kërkoi që të bëhet më shumë për të mbrojtur civilët palestinezë.

Rruga Press