Izraeli pretendon se ka hyrë brenda tuneleve të militantëve në Gaza
Izraeli ka njoftuar se forcat e tij luftuan me njerëz të armatosur të Hamasit brenda rrjetit të gjerë të tuneleve të militantëve nën enklavën e rrethuar palestineze të Gazës, duke kërkuar lirimin e pengjeve dhe shtyrjen përpara të fushatës për zhdukjen e grupit militant, raporton Reuters.
Teksa beteja brenda Gazës u intensifikua, kryeministri izraelit Benjamin Netanyahu hodhi poshtë thirrjet për ndalimin e luftimeve.
Por, ndërkombëtarët paralajmëruan se një katastrofë e shëndetit publik po përfshinte civilët në Gaza, me spitalet që po përpiqeshin të përballonin viktimat dhe ushqimi, ilaçet, uji i pijshëm dhe karburanti po mbaronin.
Mjekët në Spitalin indonezian të Gazës thanë se duhej të krijonin një sallë operacioni në një korridor, sepse sallat kryesore kirurgjikale ishin plot nga një fluks i papritur i viktimave civile nga bombardimet izraelite herët të martën.
Tunelet nën enklavën e ngushtë janë një objektiv kryesor për Izraelin pasi zgjeron operacionet e tij tokësore dhe e shtyn më tej në Gaza nga veriu për të goditur Hamasin në shenjë hakmarrjeje.
Disa nga 240 pengjet që Izraeli thotë se u kapën nga Hamasi tri javë më herët, edhe kur nisi lufta, besohet se mbahen në kompleksin e tunelit, duke shtuar një ndërlikim të mëtejshëm për izraelitët në krye të vështirësive të luftimit në një mjedis urban.
Militantët u përgjigjën me raketa antitank dhe mitraloz. Një numër militantësh u vranë, pa specifikuar numrin.
Forcat izraelite bombarduan gjithashtu Gazën gjatë natës në sulme ajrore, detare dhe tokësore, duke goditur zonat veriperëndimore të enklavës, të cilat i sundon Hamasi.
Të hënën, forcat izraelite kishin shënjestruar rrugën kryesore veri-jug të Gazës dhe sulmuan qytetin e Gazës.
Autoritetet shëndetësore të Gazës thonë se 8 mijë 525 njerëz, duke përfshirë 3 mijë e 542 fëmijë, janë vrarë në sulmet izraelite që nga 7 tetori. Zyrtarët e OKB-së thonë se më shumë se 1.4 milion nga popullsia civile e Gazës prej rreth 2.3 milionë janë bërë të pastrehë.
Sipas Izraelit, rreth 1 mijë e 400 njerëz u vranë në sulmin e Hamasit më 7 tetor.
Rruga Press