Kasami: Ose të ndërrohet himni i Maqedonisë, ose në komunat me shumicë shqiptare të intonohet edhe himni shqiptar

Kryetari i Lëvizjes Besa, njëherë edhe kryetar i komunës së Tetovës, Bilall Kasami sot sërish komentoi idenë e kryetarit të OBRM-PDUKM-së, Hristijan Mickoski që çdo javë në shkolla fillore të intonohet himni kombëtar i Maqedonisë së Veriut.

Kasami thotë e në këtë rast, ose himni duhet të ndryshohet, që të ketë karakter multietnik, ose duhet që në vendbanimet me shumicë shqiptare, të intonohet edhe himni i Shqipërisë.

“Himni i shtetit nuk reflekton realitetin multietnik të shtetit dhe shoqërisë në Maqedoni të Veriut, për derisa është ky realitet atëherë ne kërkojmë, këtë qëndrim e kam dhënë si kryetar i komunës së Tetovës, nuk është që është koordinuar me partitë tjera, atëherë kjo nënkupton që ose duhet të ndërrohet himni i shtetit dhe të respektojë diversitetin kulturor dhe etnik, ose nëse bihet vendim që kështu si është të intonohet, atëherë duhet të respektohet përkatësia multietnike e shtetit dhe e shoqërisë dhe në vendet, komunat apo lokalitetet me shumicë shqiptare, si komuniteti i dytë shumicë, duhet të intonohet edhe himni shqiptar”, tha Kasami.

Kasami poashtu sot akuzoi ministrin e Jashtëm Bujar Osmani, si kryetar i OSBE-së, ka keqpërdorur pozitën e tij për të ndikuar te vëzhguesit e zgjedhjeve të vitit të ardhshëm

“Për ne, mbajtja e zgjedhjeve të lira, të ndershme dhe demokratike është prioritet. Kemi marrë informacione se Bujar Osmani dëshiron të abuzojë me presidencën e OSBE-së për të ndikuar në vendimin për numrin e vëzhguesve në procesin zgjedhor. Ne e dimë se çfarë janë të aftë për të ruajtur pasurinë, prandaj opozita e bashkuar shqiptare ka legjitimitet të kërkojë përfaqësim adekuat në KSHZ. Ai ka paraqitur një iniciativë konkrete për plotësimin e pozitës tonë në KSHZ dhe kërkojmë nga BDI dhe LSDM që të mos e vonojnë.

Ne besojmë se është krejtësisht irracionale të bëhen shpenzime të dyfishta, por duam të dëgjojmë argumentet e LSDM-së dhe BDI-së me të cilat do të mbrojnë qëndrimin për zgjedhje të ndara”, tha Kasami.

Rruga Press