Frika e BE-së si dimensionin irracional dhe politik

Shkruan Roland Amzai

Sot Albin Kurti u takua për të disatën herë me Aleksandër Vuciqin me ndërmjetësimin e Josep Borrel-it dhe Miroslav Lajcak-ut.

Ndërmjetësit nuk janë rastësi. Nuk janë të lodhur fizikisht individët që duken hera herës dhe të luhatshëm emocionalisht. E lodhur është Europa.

Në momentet kur po mbaronte takimi mes Kurtit dhe Vuciqit në Bruksel, nga ana tjetër në Frankfurt, BE-ja kishte një mbledhje tjetër të rëndësishme, atë të Bankës Qendrore Europiane.

Ata vendosen që kamatat bazë të rriten edhe për 0.25% pikë të tjera.

Ndërkohë që shitjet dhe GDP-ja po bie, inflacioni dhe interesat po rriten.

Ç’logjikë i lidh këto?

Ekspozimi ndaj agresivitetit serb, e rrit rrezikun e konfliktit.

Nga ana tjetër shumë kritikë po shprehen se edhe FED dhe ECB po rrisin kamatat me një ritëm shumë më të ngadaltë nga frika ndaj recesionit, për pasojë po e rrisin agoninë e pritjes dhe pasigurisë.

Ngurrimi për ta shkaterruar inflacionin (së bashku me GDP-në dhe tregjet kapitale), është i njejtë me ngurrimin për të goditur e sanksionuar këdo aktor rajonal a global që kërcënon sigurinë e një rajoni a një kontinenti.

Frika, po shndërrohet në një metodë pune në vendimmarrje “smart”.

Le t’i rrisin kamatat, por kujdes tregjet, le ta njohin Kosovën, por kujdes Serbinë i duhet dhënë dicka.

Kështu inflacioni rritet, Serbia trimërohet, e tek në fund, rezultati është i njejtë veçse më masiv. Konflikt dhe varfëri.

Rruga Press