Joseph: Nënshkrimi në letrën dërguar BE-së e SHBA-së, është njohje joformale e Kosovës nga ana e Ukrainës

Analisti Eduard Joseph këtë të martë ka folur rreth letrës së dërguar BE-së dhe SHBA-së nga deputetja britanike, Alicia Kearns dhe eurodeputeti ukrainas, Oleksandr Merezhko, për raportin Kosovë-Serbi.

Analisti tha ndër të tjera se Oleksandr Merezhko ka nënshkruar që e njeh Kosovën si një shtet sovran.

Kjo sipas tij, është një lloj njohje informale e Kosovës nga ana e Ukrainës.

“Merezhko e di se implikimi i një nënshkrimi që e njeh Kosovën si një shtet sovran është një formë e njohjes së Kosovës nga ana e Ukrainës, një lloj njohje informale”.

“Zgjidhja për çështjen aktuale do të trajtohet nga njohja e Kosovës nga pala e Ukrainës, sepse kjo do bënte që pesë shtetet që nuk e kanë njohur Kosovën, do e njohin atë. Me hapat përpara drejt njohjes marrëdhëniet mes Kosovës dhe Serbisë kanë për të ndryshuar”, tha ai për Euronews Albania.

Për këtë letër njoftoi deputetja britanike, Alicia Kearns, e cila po ashtu bëri publike përmbajtjen e saj.

“Qasja aktuale nuk po funksionon. Ne kërkojmë që komuniteti ndërkombëtar që të mësojë nga e kaluara jonë dhe të sigurohet që të mos miratojmë një politikë me qendër Beogradin në Ballkan”, thuhet ndër të tjera në letër.

Sipas deputetes në fjalë, është e rrallë që kaq shumë kryetarë të komiteteve për punë të jashtme të bëhen bashkë njëzëri kundrejt një shqetësimi që kanë.

“Ne kemi nevojë për diplomaci parandaluese, ku sigurohemi që do të ketë ekuilibër në marrëdhëniet tona dhe të mos përsërisim gabimet e së kaluarës. Është e rrallë që kaq shumë Kryetarë të Komiteteve të Punëve të Jashtme të mblidhen për të ngritur shqetësimet dhe për të shprehur një angazhim të përbashkët për de-përshkallëzimin”, ka thënë ajo.

Këtë mbështetje e kanë vlerësuar lart nga Qeveria e Kosovës dhe Presidenca.

Rruga Press