Pavarësisht presionit, autoritetet e Afrikës së Jugut nuk duan ta arrestojnë Putinin

Presidenti i Afrikës së Jugut, Cyril Ramaphosa, ka thënë se çdo përpjekje për të arrestuar presidentin rus Vladimir Putin gjatë vizitës në vendin e tij do të ishte “shpallje lufte” kundër Rusisë, shkruan BBC.

Ramaphosa ka thënë në dokumentet e gjykatës të publikuara dje se “Rusia e ka bërë të qartë se arrestimi i presidentit të saj do të ishte shpallje lufte”.

Partia më e madhe opozitare e Afrikës së Jugut, Aleanca Demokratike, ka shkuar në gjykatë në përpjekje për të detyruar autoritetet të arrestojnë Putinin nëse ai shkel në vend.

Si nënshkruese e traktatit për krijimin e Gjykatës Ndërkombëtare Penale, Afrika e Jugut është e detyruar të arrestojë Putinin bazuar në aktakuzën që lideri rus u padit nga gjykata në mars për krime lufte, duke përfshirë rrëmbimin e fëmijëve nga Ukraina.

Në përgjigjen e tij, Ramaphosa i përshkroi lëvizjet si të papërgjegjshme, duke thënë se siguria kombëtare ishte në rrezik. Sipas presidentit, Afrika e Jugut po kërkon përjashtim nga rregullat e GJNP-së me arsyetimin se arrestimi mund të kërcënojë “sigurinë, paqen dhe rendin e shtetit”.

“Do të ishte kundër kushtetutës sonë të rrezikonim luftën me Rusinë”, ka thënë ai.

Putini ishte i ftuar në Afrikën e Jugut në gusht, kur vendi po pret një takim për anëtarët e vendeve të BRICS (Brazili, Rusia, India, Kina dhe Afrika e Jugut). Lejimi i Putinit për të marrë pjesë në takimin e BRICS do të rëndonte më shumë marrëdhëniet e Afrikës së Jugut me SHBA-në dhe partnerët e tjerë kryesorë diplomatikë dhe tregtarë perëndimorë.

Marrëdhëniet SHBA-Afrika e Jugut janë tashmë të tensionuara pasi SHBA-ja akuzoi vendin më të zhvilluar të Afrikës për furnizimin e Moskës me armë për luftën e saj në Ukrainë në një anije ruse mallrash që vizitoi bazën kryesore detare të Afrikës së Jugut pranë Cape Town në dhjetor.

Afrika e Jugut ka mohuar çdo transaksion armësh, por Ramaphosa urdhëroi një hetim për vizitën e anijes Lady R, e cila është nën sanksionet e SHBA-së për gjoja transportimin e armëve në Moskë.

Rruga Press