Termi ‘asociacion’ pas 27 shkurtit dhe 18 marsit nuk ‘ekziston’ më

Shkruan Hana Fehmiu

Termi ‘asociacion’ pas 27 shkurtit dhe 18 marsit 2023, nuk ‘ekziston’ më, përveçse në diskursin e përditshëm publik dhe thjesht vetëm si inercion.

Kjo e para, dhe më e rëndësishmja, meqë tash ai nocion i formës së asociimit është reduktuar në termin e thjeshtë të vetëmenaxhimit, falë një pune përgjithësisht këshilltarie mjeshtërore ekipore, tekniko-administrative dhe institucionale.

Jo që Kosova e ka për ta ngulmuar fjalën e saj si të fundit, porse, nga shkaku se e ka për detyrë dhe përgjegjësi të patjetërsueshme mbrojtjen e rendit ligjor dhe atë kushtetues, e që këta të dy nuk lejojnë asnjë lloj versioni draft-statutësh që në cilëndo formë a mënyrë do ta de-etatizonin apo defunksionalizonin punën e mëtejshme të shtetëzimit të Republikës së Kosovës. Njëherit duke iu shkaktuar pengesa të vazhdueshme (si në dekadat tashmë të përmbyllura) në angazhimin e saj me aktivitete shumëfish intensive në procesin e integrimit në kuadër të Bashkimit Europian.

Hap pas hapi edhe komuniteti serb do të kuptojë se Republika e Kosovës disponon një nga platformat kushtetuese, ligjore dhe institucionale të demokracive më të avancuara dhe jo vetëm në kontinentin evropian, edhe se pa asnjë drojë do të kuptohet e ardhmja e tyre e garantuar shumë më e mirë edhe se në shtetin e prejardhjes së tyre. Kjo nga njëra anë.

Në tjetrën, Kosova me vizionin e kryeministrit Kurti, frymëzuar nga modeli i zgjidhjes problemore bazuar në draftin kontekstual serbo-kroat, kësisoji siguron funksionalitetin e saj të plotë shtetëror dhe institucional si dhe ruajtjen dhe mbrojtjen e rendit kushtetues, me shtrirjen e plotë jurisdiksionale, cep më cep të Kosovës. Këmbëngulja që të pranohet versioni i draftit të përgatitur nga pala kosovare, është jo vetëm garancë afatgjatësie, porse edhe mundësi, sepse një tillë vjen një herë në shumë vjet, për të mos thënë dekada apo shekuj.

Rruga Press