Nuk ka kuorum në kuvend, Konjufca: Kjo legjislaturë nuk e meriton të vazhdojë

Kryetari i Kuvendit të Kosovës, Glauk Konjufca, ka thënë se kjo legjislaturë nuk e meriton të vazhdojë për shkak të sjelljeve të papërgjegjshme të deputetëve.

Kuvendi planifikoi të mblidhej sot për gjashtë seanca të papërfunduara. Ishte paraparë që të nisë në orën 10:00, por shkaku i mungesës së kuorumit nuk ka filluar ende. Shumica pati 59 deputetë në sallë. 

“Me këtë sjellje të papërgjegjshme të deputetëve, kjo legjislaturë mendoj se nuk e meriton të vazhdojë”, ka thënë Konjufca, teksa po pret që të bëhen 61 deputetë të shumicës.

Kryekuvendari tutje ka thënë se seanca është shtyrë për në 12:30 pas premtimit që ka marrë se deputetët e shumicës do të jenë në seancë.

“Për shkak që situata është kështu dhe shumica e pikave janë votime, meqë janë kryer shqyrtimet, e kam qëndrimin e partive tjera që nuk do të votojnë, kështu që shihemi në orën 12:30 kur mazhoranca po premtojnë që i sjellin deputetët”, ka thënë ai.

Edhe javën e kaluar, seanca e Kuvendit nuk u mbajt për shkak të mungesës së kuorumit.

Rruga Press