Kurti për dialogun: Njohje reciproke si thelb, reciprocitet si princip

Kryeministri i Kosovës, Albin Kurti, ka thënë të shtunën se Kosova është treguar e përkushtuar sa i përket dialogut me Serbinë për normalizimin e marrëdhënieve.

Kurti ka deklaruar gjatë mbledhjes së 50-të të Këshillit të Përgjithshëm të Lëvizjes VETËVENDOSJE!, se statusi aktual i marrëdhënieve Kosovë-Serbi nuk është normal.

“Në raport me Serbinë, kemi marrë pjesë në takimet e bisedimit në Bruksel sa herë që jemi ftuar, kemi pritur emisarët specialë sa herë që kanë ardhur. Kemi qenë e do të jemi të përkushtuar, konstruktiv, parimor e kreativ. Dialogu në Bruksel është dialog për normalizimin e marrëdhënieve ndërmjet Kosovës e Serbisë, është dialog për statusin e marrëdhënieve, statusi aktual i marrëdhënieve nuk është normal e status normal është ai i fqinjësisë së mirë. Pra njohje reciproke si thelb dhe reciprociteti si princip”, ka deklaruar Kurti dy ditë para takimit me presidentin serb, Aleksandër Vuçiq në Bruksel.

Ai ka folur edhe për liberalizimin e vizave për qytetarët e Kosovës, duke thënë se presin që kjo të ndodhë nga 1 janari i vitit 2024, ashtu siç është premtuar publikisht.

Kurti ka folur edhe për qeverisjen e partisë së tij në këto dy vjet, me ç’rast ka deklaruar se asnjë qeveri gjatë Kosovës së lirë nuk është përballur me vështirësi të natyrave globale si qeverisja e tij.

“Pas tri javësh bëhen dy vite prej se kemi filluar të qeverisim, po arrijmë gjysmën e mandatit tonë. Janë dy vite plotë me punë pavarësisht vështirësive që po kalon e gjithë bota. Asnjë qeveri gjatë Kosovës së lirë nuk është përballur me vështirësi të tilla të natyrës globale”, ka thënë Kurti duke u shprehur krenar, për siç ka thënë, asnjë skandal korruptiv gjatë qeverisjes.

Rruga Press