Kroacia gjen eshtrá nga lufta e viteve 1990 pranë Vukovarit

Një zhvarrim është duke u zhvilluar pranë qytetit të Vukovarit, në një fshat ku janë zbuluar mbetje mortore që besohet t’i përkasin viktimave të luftës të viteve 1990.

Ministria e Veteranëve Kroatë i tha BIRN të enjten se një zhvarrim po vazhdon pranë fshatit Svinjarevac, dhjetë kilometra larg Vukovarit në qarkun Vukovar-Srijem në Kroacinë lindore, pasi atje u gjetën të varrosura mbetje njerëzore.

Sipas gjetjeve paraprake, eshtrat janë ato të njerëzve që vdiqën në luftën e viteve 1990 në Kroaci, tha ministria. Numri i saktë i trupave në varr ende nuk është përcaktuar.

Pas përfundimit të kërkimit dhe zhvarrimit, eshtrat do të transportohen në Institutin e Mjekësisë Ligjore në Zagreb për përpunim dhe identifikim të mëtejshëm.

Ministria tha se zhvarrosja mund të përfundojë javën e ardhshme, kur do të dihen më shumë informacione rreth gjetjeve.

“Kërkimet në atë zonë filluan javën e kaluar, por ne nuk donim ta bënim publike derisa të shihnim se çfarë do të gjenim. Në të njëjtën kohë, kërkimet kanë vazhduar për një kohë të gjatë edhe në vende të tjera”, tha për BIRN zëdhënësja e ministrisë Marija Trogrliç.

Vukovari u rrethua për tre muaj gjatë luftës nga Ushtria Popullore Jugosllave dhe paraushtarakët serbë, të cilët ekzekutuan disa qindra ushtarë dhe civilë kroatë pas rënies së qytetit në nëntor 1991. Rreth 3,000 njerëz vdiqën në betejën për Vukovarin në përgjithësi.

Kroacia është ende në kërkim të 1,816 personave, trupat e të cilëve nuk janë gjetur që nga lufta. Numri më i madh i viktimave të zhdukur të kohës së luftës, 513 prej tyre, janë nga qarku Vukovar-Srijem. /birn/

Rruga Press