A do të dërgohen tanket Leopard në Ukrainë?

Presioni po rritet nga të gjitha anët ndaj kancelarit gjerman Olaf Scholz për të furnizuar Ukrainën me tanke luftarake “Leopard”. Po si do të pozicionohet kancelari dhe qeveria gjermane?

“Abrams apo Leopard? Çfarë mendoni, cilat do të dërgohen më parë në Ukrainë?” Ministria e Mbrojtjes e Ukrainës e bëri këtë pyetje në Twitter të shtunën (7 janar). A do të dërgohen më parë në Ukrainë tanket amerikane Abrams ose Leopardët gjermanë?

Por përdoruesit e Twitter e marrin njoftimin e Kievit pak më ndryshe dhe kryesisht diskutojnë se cili tank do të ishte më i mirë për nevojat e ushtrisë ukrainase. Një vështrim sipërfaqësor i diskutimit tregon se ata mendojnë se më i përshtatshëm do të ishte Leopard.

Për muaj të tërë, Ukraina u ka kërkuar aleatëve të saj perëndimorë që ta furnizojnë atë me tanke të rënda luftarake,siç është Leopard. Por Berlini heziton dhe është justifikuar vazhdimisht duke thënë se nuk dëshiron të provokojë Rusinë, e cila mund ta perceptojë dërgimin e këtyre tankeve si kontribut aktiv të Gjermanisë në luftë.

Por vendimi i javës së kaluar nga ministrja gjermane e Mbrojtjes Kristina Lambrecht (SPD) për të dërguar 40 automjete luftarake këmbësorie të tipit Marder në Ukrainë ndryshoi situatën. Mbi të gjitha, kancelari Olaf Scholz (SPD) është nën presion. Partnerët e koalicionit, të Gjelbrit dhe Liberalët (FDP), si dhe Unioni CDU/CSU në opozitë po kërkojnë tani dërgesat e Leopardit prej tij. E ndërkohë edhe përfaqësuesit e Bashkimit Evropian janë gjithnjë e më të zëshëm me këto kërkesa.

“Thembra e Akilit e Evropës”

Në një seancë të mbyllur të organizuar nga Unioni Kristiansocial Bavarez (CSU) këtë fundjavë në Seon, jo shumë larg Mynihut, Presidentja e Parlamentit Evropian, Roberta Metsola u angazhua për dërgimin e tankeve luftarake në Ukrainë. Rusia, siç tha ajo, dëshiron që Evropa të kthejë kokën nga Ukraina. Kjo nuk duhet lejuar. Është e rëndësishme që Evropa të vazhdojë të mbështesë ukrainasit – politikisht, me ndihma humanitare  dhe ushtarakisht, theksoi Metsola.

Në të njëjtën kohë, kreu i grupit të CSU në Bundestag, Aleksandar Dobrint, sulmoi ashpër kancelarin Scholz, duke e akuzuar atë për dobësi në drejtim. “Një qeveri e dobët federale është thembra e Akilit e Evropës,” tha politikani i CSU.

Ish-oficeri i Bundeswehrit, tani politikan i CDU-së, Roderich Kiesewetter, foli gjithashtu për këtë çështje. Ai i tha radios Deutschlandfunk se dërgesat e Marder mund ta bëjnë të qartë se, nëse Rusia nuk lëviz drejt negociatave, “hapi tjetër do të jetë trajnimi i ushtarëve të Ukrainës në përdorimin e tankeve të tjera dhe dërgimi i këtyre tankeve në Ukrainë”.

Presidenti rus Vladimir Putin tha në fund të javës së kaluar se Moska është e gatshme të negociojë, por vetëm nëse Ukraina pranon pushtimet e mëparshme ruse.

„Ukranasit nuk kanë tepër shumë kohë“

Markus Faber, deputeti liberal përgjegjës për çështjet e mbrojtjes, i tha më parë gazetës Rheinische Post se 180 tanke më të vjetra Leopard 1 janë në pritje të një leje eksporti nga Berlini në mënyrë që të mund të dërgohen në Ukrainë. “Ukrainasve po u mbaron koha,” paralajmëroi Faber.

Edhe Marie-Agnes Strak-Zimmermann, kryetarja e Komisionit të Mbrojtjes në Bundestag, i tha gazetës Neue Osnabrücker Zeitung: “Partnerët evropianë po presin që Gjermania të jetë gati të dërgojë disa nga tanket e saj luftarake Leopard.” Trajnimi për ushtarët ukrainas ishte parashikuar të fillonte gjatë vjeshtës, kritikoi ajo. Deputeti ekologjist Anton Hofreiter po ashtu kërkon dërgimin e këtyre armëve.

Ambasadori ukrainas në Gjermani Alexii Makejev së fundmi shprehu besimin e tij se, përveç Marder, në Ukrainë mund të dërgohen edhe tanke luftarake të tipit perëndimor. “Unë jam optimist. “Pas gati një viti që nga fillimi i këtij pushtimi rus, shumë në Gjermani më në fund e kanë kuptuar se kjo luftë ka të bëjë me ekzistencën e Ukrainës dhe paqen në të gjithë Evropën,” tha Makejev për të përjavshmen “Wirtschaftswoche”.

SPD kundër

Por Lars Klingbeil, kryetar i SPD, partia e kancelarit gjerman, hodhi poshtë mundësinë e dërgimit të Leopardëve në Ukrainë menjëherë pas Marderit. “Asnjë vend nuk po furnizon Ukrainën me tanke të rënda beteje si Leopard 1 ose 2,” tha Klingbeil.

Presidenti rus Vladimir Putin po vepron jashtëzakonisht brutalisht në Ukrainë.Ai ka përshkruar për një kohë të gjatë vendet perëndimore si Gjermania si palë në luftë, vuri në dukje Klingbeil. Në këtë kuptim, është e vërtetë, thotë ai, se “amerikanët, francezët, por edhe ne si qeveri gjermane, vazhdimisht po e shqyrtojmë rrezikun e përfshirjes në luftë”. Klingbeil megjithatë nuk e përjashtoi mundësinë që Leopard në një periudhë të mëvonshme të dërgohet në Ukrainë.

Po çfarë mendojnë gjermanët? Sipas një sondazhi të bërë nga agjencia INSA për edicionin javor të gazetës “Bild”, 49 për qind e qytetarëve mendojnë se dërgimi i planifikuar i Marderit është i gabuar, ndërsa 40 për qind e mbështesin vendimin. Ndërsa në pyetjen nëse Gjermania duhet të dërgojë edhe tanke të rënda luftarake në Ukrainë, 50 për qind e të anketuarve u përgjigjën “jo”, ndërsa 38 për qind ishin pro. Të tjerët nuk janë deklaruar për çështjen./Deutsche Welle

Rruga Press