Kosova ia ndalon hyrjen ish-ministrit të Jashtëm të Serbisë

Ministrja e Punëve të Jashtme e Kosovës, Donika Gërvalla, ka konfirmuar të shtunën se i është ndaluar hyrja në Kosovë, Vuk Jeremiqit, ish-ministër i Punëve të Jashtme të Serbisë.

“Mbështetja e Jeremiqit në parlamentin serb për atë që e kanë quajtur ‘riintegrim’ i Kosovës së pavarur në Serbi është i ngjashëm me planin e Putinit për ‘riintegrimin’ e Ukrainës – pra një recetë për luftë”, ka thënë Gërvalla në Facebook.

Në reagimin e saj, Gërvalla ka thënë se “Kosova nuk do të tolerojë urrejtjen dhe agresionin ndaj një shteti evropian dhe demokratik”.

“Evropa dhe SHBA-të duhet të vëzhgojnë me vëmendje veprimet e klasës politike në Serbi dhe në rajon. Radikalizimi i ish-drejtuesit të Asamblesë së Përgjithshme të OKB-së është vetëm një paralajmërim më shumë se oreksi i Serbisë dhe Rusisë për territore nuk është ngopur ende. Rusia dhe Serbia nuk do të ndalen së krijuari gjithnjë e më shumë tensione në Ballkan për aq kohë sa SHBA-të dhe Evropa nuk dërgojnë sinjale të qarta dhe të fuqishme duke kërkuar me këmbëngulje zgjidhjen e vetme të qëndrueshme për krizat dhe paqëndrueshmërinë në Ballkanin Perëndimor, pra duke kërkuar nga Serbia njohjen e realitetit të ri në Ballkan pas luftërave të saj shkatërruese”, thuhet në deklaratën e saj.

“Kosova është dhe do të mbetet e pavarur dhe sovrane, përkrahëse e fortë e perspektivës evropiane dhe NATO-s dhe në kufi me Serbinë. Kosova dhe fqinjët e tjerë të Serbisë, të cilët ende nuk janë anëtarësuar në BE, as nuk janë sferë e ndikimit të Serbisë, dhe as nuk do të ‘riintegrohen’ ndonjëherë në ‘Botën Serbe’ të Vuçiçit dhe Putinit”, ka thënë Gërvalla.

Ndalimi i hyrjes së Jeremiqit ndodh në ditën kur serbët në Kosovë vendosën të tërhiqen nga institucionet. Vendimin e arsyetuan me shkallëzimin e sanksioneve që Qeveria e Kosovës bëri për refuzuesit e konvertimit të targave ilegale në ato RKS. Për moszbatim të vendimit të Qeverisë, u suspendua drejtori i Policisë në veri, Nenad Gjuriq.

Rruga Press