“Kam rikthyer kontaktet me Putinin”, zbulohet biseda e Berlusconit me presidentin rus
Ish-kryeministri italian, Silvio Berlusconi ka rikthyer kontaktet me presidentin rus, Vladimir Putin.
Agjencia e lajmeve “La Presse” ka publikuar një incizim të zërit – që duket se është bërë në mënyrë sekrete – derisa Berlusconi ka biseduar me pjesëtarë të partisë Forza Italia.
Në atë incizim Berlusconi dëgjohet të thotë: “Kam rikthyer kontaktet me presidentin Putin”.
Ai tregon më tej se Putini i ka dërguar “20 shishe me vodka dhe një letër shumë të ëmbël”, për ditëlindje.
Këto komente fillimisht janë hedhur poshtë si “muhabete të vjetra”, nga besnikët e Berlusconit.
Kujtojmë që në shtator të këtij viti u raportua nga mediat se ish-kryeministri i Italisë dhe lideri i Partisë Forza Italia (FI), Silvio Berlusconi, deklaroi që presidenti i Rusisë, Vladimir Putin, u detyrua nga partia e tij, ministrat dhe nga publiku të fillojë luftën në Ukrainë.
Kreu i Partisë Forza Italia, Berlusconi u bë objekt diskutimi me deklaratën e tij për luftën Rusi-Ukrainë në programin ku ai mori pjesë në kanalin shtetëror italian RAI.
“Dy republikat pro-ruse në Donbas shkuan në Moskë dhe u takuan me shtypin, me të gjithë dhe me Putinin, dhe deklaruan se (presidenti ukrainas Volodymyr) Zelenskyy ka shtuar sulmet e tij dhe kërkuan ndihmë. Putin është inkurajuar nga populli rus, partia e tij dhe ministrat e tyre për të filluar këtë operacion special. Në fakt, ushtarët duhej të hynin në Kiev brenda një jave dhe të zëvendësonin qeverinë Zelenskyy me njerëz të mirë dhe të ktheheshin. Në vend të kësaj, ata hasën në rezistencë të papritur, të pajisur me të gjitha llojet e armëve nga perëndimi”, u shpreh Berlusconi.
Për shkak të miqësisë së tij me liderin e Rusisë, Putin, Berlusconi mori kritika të ashpra.
Kreu i partisë së qendrës së majtë, Partia Demokratike (PD), Enrico Letta tha: “Një fjali skandaloze është shumë e rëndë. Ai tha atë në të cilën besonte. Të dielën në mbrëmje, nëse aleanca e djathtë fiton, Putini do të ngrejë dolli”.
Kreu i Partisë së Veprimit (Az), Carlo Calenda, e cila pozicionohet në qendër me emrin “Poli i tretë”, tha: “Deklarata e djeshme ishte një fatkeqësi. Fjalët e Berlusconit ishin si fjalët e një gjenerali të Putinit”.
I pyetur në lidhje me deklaratat e Berlusconit në lidhje me Putinin, Eric Mamer, zëdhënësi i Presidentes së Komisionit të BE-së, Ursula von der Leyen, u shpreh se nuk ka koment.
Nënkryetari i partisë FI të Berlusconit, Antonio Tajani, tha se fjalët e liderit të tij ishin marrë jashtë kontekstit dhe ishin të qarta për dënimin e Rusisë.
Silvio Berlusconi gjithashtu postoi në llogarinë e tij në Twitter këtë mëngjes se fjalët e tij ishin “thjeshtuar shumë” dhe se: “Agresioni kundër Ukrainës është i padrejtë dhe i papranueshëm. Pozicioni i “Forza Italia” është i qartë. Ne jemi gjithmonë me BE dhe NATO”.
Rruga Press