Përkundër sanksioneve, Hungaria dhe Serbia ranë dakord të ndërtojnë tubacion për naftën ruse në Serbi

Hungaria dhe Serbia kanë rënë dakord të ndërtojnë një tubacion për të furnizuar Serbinë me naftën ruse Urals përmes tubacionit të naftës Druzhba, pasi dërgesat e Beogradit përmes Kroacisë bien nën sanksionet e BE-së, tha të hënën qeveria hungareze.

Javën e kaluar Bashkimi Evropian ra dakord për kufizime të reja kundër Rusisë lidhur me luftën e saj kundër Ukrainës, të cilat përfshijnë një kufi të çmimit të naftës për dërgesat ruse të naftës së papërpunuar nga deti në vendet e treta. Serbia e merr naftën e saj nëpërmjet tubacionit të naftës JANAF nga Kroacia.

“Tubacioni i ri i naftës do t’i mundësonte Serbisë të furnizohej me naftë bruto më të lirë Urals, duke u lidhur me tubacionin e naftës ‘Miqësia’,” shkroi në Twitter zëdhënësi i qeverisë hungareze Zoltan Kovacs.

Ai shtoi se furnizimi me naftë i Serbisë ishte kryesisht nëpërmjet një tubacioni përmes Kroacisë, “por kjo nuk ka gjasa të jetë e mundur në të ardhmen për shkak të sanksioneve që janë miratuar”.

Hungaria, e cila varet kryesisht nga nafta dhe gazi rus, ka qenë kritiku më i zëshëm i sanksioneve kundër Rusisë në BE, duke thënë se masat rritën çmimet e energjisë. Budapesti mbështeti paketën e sanksioneve të javës së kaluar.

Dega jugore e tubacionit Druzhba ose Miqësia, kalon përmes Ukrainës në Hungari, Sllovaki dhe Republikën Çeke dhe ka qenë burimi kryesor i furnizimit për rafineritë e të tre vendeve për vite me rradhë.

Kompania e vetme serbe e naftës është NIS, në të cilën Gazpromi rus Neft (SIBN.MM) dhe Gazprom (GAZP.MM) së bashku mbajnë shumicën e aksioneve.

Në fillim të këtij muaji, Hungaria tha gjithashtu se do ta ndihmonte Serbinë me gaz nëse do të ishte e nevojshme.

Hungaria ka rezerva gazi që mbulojnë rreth pesë deri në gjashtë muaj konsum, tha kryeministri Viktor Orban./Reuters

©Rruga Press