Ukraina: Më shumë se gjysmë milioni ton drithë u eksportuan

Më shumë se gjysmë milioni ton drithë janë eksportuar nga Ukraina nëpërmjet Detit të Zi që nga fillimi i gushtit, njoftuan Kombet e Bashkuara të martën.

Që kur u arrit një marrëveshje në fund të muajit të kaluar për të rifilluar eksportet, 36 kalime janë miratuar, tha OKB, duke shtuar se 21 anije u larguan nga portet e Ukrainës në drejtim të Bosforit dhe 15 kaluan ngushticën në drejtim të vendit të shkatërruar nga lufta.

Gjithsej 27 anije mallrash u kontrolluan në Turqi sipas marrëveshjes.

Vlerësohet se mbi 20 milionë tonë drithë dhe produkte të tjera janë bllokuar në Ukrainë që nga fillimi i luftës të cilën Rusia e pagëzoi “operacion special ushtarak”, duke vendosur bllokadë në portet e vendit fqinj.

Nga produktet e eksportuara, më shumë se një e katërta shkoi në Turqi, 22% në Iran dhe Korenë e Jugut, 8% në Kinë dhe 6% në Irlandë, sipas shifrave të OKB-së.

Dje të martën, Brave Commander, një anije mallrash e marrë me qira nga organizata, u nis për në Xhibuti, në Afrikën Lindore, duke transportuar grurë me destinacion Etiopi. 

Deri më tani janë eksportuar 560 mijë tonë drithë.

Në fund të korrikut, palët ndërluftuese ranë dakord për garancitë e ndërmjetësuara nga OKB-ja dhe ndërmjetësimi i Turqisë për të hapur një korsi detare për të lejuar Ukrainën të rifillojë eksportin e produkteve agro-ushqimore përmes porteve të saj të Detit të Zi, pavarësisht luftës me Rusinë.

OKB-ja ka paralajmëruar për muaj të tërë kundër rrezikut të mungesës së ushqimit dhe urisë në vendet e varfra të botës nëse Ukraina, një furnizues kryesor ndërkombëtar, nuk arrin të rifillojë eksportet që u pezulluan kur ushtria ruse pushtoi territorin e saj më 24 shkurt.

Rruga Press