Lufta në Ukrainës/ Mes pasigurisë dhe frikës, nis puna në tre porte për hapjen e “korridoreve” për transportin e grurit

Ukraina ka filluar punën në tre porte që synojnë formimin e “korridoreve të gjelbërta” për të lejuar eksportet e grurit.

Një zëdhënës i administratës ushtarake të Odesës tha se ekipet detare do të ndërtojnë rrugë nga portet jugore në Odesa, Chornomorsk dhe Pivdennyi.

Pasi të hapen rrugët, “karvanët” e anijeve detare ukrainase do të lundrojnë nëpër Detin e Zi, tha Serhiy Bratchuk.

Kievi dhe Moska arritën një marrëveshje për të lejuar eksportet e grurit javën e kaluar.

Sipas marrëveshjes, e cila u ndërmjetësua nga Turqia dhe OKB-ja, Rusia ra dakord të mos sulmonte portet ndërsa gruri ishte në tranzit, ndërsa Ukraina u zotua të drejtonte anijet e mallrave nëpër ujërat që janë minuar.

Megjithatë, marrëveshja u shkel më pak se 24 orë pas nënshkrimit të saj, kur dy raketa ruse shënjestruan një port në qytetin e Odesës.

Rusia tha se sulmi kishte në shënjestër një anije të marinës ukrainase të ankoruar në port. Presidenti i Ukrainës, Volodymyr Zelensky, tha se sulmi tregoi se Moskës nuk mund t’i besohet dhe akuzoi vendin për “barbarizëm”.

Dhe të mërkurën në mëngjes, zëvendësministri i Jashtëm rus Andrei Rudenko paralajmëroi se marrëveshja mund të shembet nëse pengesat për eksportet ruse bujqësore nuk hiqen, njoftoi agjencia e lajmeve Interfax.

Pavarësisht pasigurisë, Bratchuk tha se Ukraina synon t’i përmbahet marrëveshjes dhe u zotua të përmbushë detyrimet e saj, pavarësisht kërcënimit të “agresionit” rus.

Ai tha se specialistët ushtarakë dhe civilë do të “kërkojnë me kujdes objektet nënujore, do të instalojnë mjete speciale të pajisjeve të lundrimit”.

Rruga Press