Rusia drejt largimit nga Stacioni Ndërkombëtar Hapësinor

Rusia deklaroi se do të tërhiqet nga Stacioni Ndërkombëtar Hapësinor (ISS) pas vitit 2024, për t’u fokusuar në ndërtimin e stacionit të saj hapësinor, raportoi “SkyNews” të martën.

Yuri Borisov, që u emërua së fundmi në krye të korporatës hapësinore ruse Roscosmos, tha gjatë një takimi me presidentin Vladimir Putin, se Rusia do t’i përmbushë detyrimet e saja ndaj partnerëve para se të largohet nga projekti.

Vendimi bëhet i ditur pas tensioneve mes Shteteve të Bashkuara të Amerikës dhe Rusisë për luftën në Ukrainë.

Paraardhësi i Borisovit, Dmitry Rogozin, deklaroi në prill se Rusia do të ndërpresë bashkëpunimin në Stacionin Ndërkombëtar, si përgjigje ndaj sanksioneve perëndimore.

Sanksionet, sipas tij, u vendosën “për ta vrarë ekonominë ruse”, derisa tha se “u tentua që populli rus të gjunjëzohej”.

Pos tensioneve të shtuara, NASA dhe Roscomosi, u dakorduan në fillim të këtij muaji që astronautët të vazhdojnë të drejtojnë raketat hapësinore të njëra-tjetrës.

Rruga Press