Kreu i OSBE-së përmbyll vizitën në Kosovë: Erdha të marr informata të dorës së parë për reformat në drejtësi
Kryesuesi i radhës i OSBE-së, ministri polak i Punëve të Jashtme, Zbigniew Rau, pas takimit me liderët politikë, ka thënë se qëllimi i vizitës së tij në Kosovë ka qenë informimi lidhur me reformat në drejtësi, luftën kundër korrupsionit, lirisë së medieve dhe reformimin e sistemit elektoral.
Në përmbyllje të vizitës së tij në Kosovë, ministri polak ka deklaruar se me përfaqësuesit e institucioneve në Kosovë ka diskutuar për mënyrat si OSBE-ja mund të ofrojë ndihmë në terren.
“Qëllimi i vizitës sime ka qenë të takohem me liderë institucionalë, partnerë të misionit të OSBE-së në Kosovë dhe të marrë informata të dorës së parë për sa i përket reformave në vijimësi e sipër në fushën e gjyqësorit, luftës kundër korrupsionit, rritjes së lirisë së mediave dhe avancimit të reformës zgjedhore, shumë të nevojshme”.
“Kemi diskutuar për mënyra të ndryshme në të cilat OSBE mund të ofrojë ndihmën e saj përmes operacioneve në terren, pranisë së saj në terren. OSBE kontribuon në zhvillimin e mëtejmë të një shoqërie demokratike dhe shumë-etnike. Shpresoj sinqerisht që kjo do të kontribuojë në stabilitetin dhe pajtimin në Evropën Juglindore”, ka thënë ai gjatë një deklarate për media.
Gjatë ditës, Rau ka takuar presidenten e Kosovës, Vjosa Osmanin, kryetarin e Kuvendit Glauk Konjufcën, kryeministrin Albin Kurtin, ministren e Jashtme, Donika Gërvallën, si dhe ka zhvilluar takim me ministrin për Komunitete dhe Kthim, Goran Rakiq.
Ministri polak ka takuar edhe kryesuesin e Komisionit Qendror të Zgjedhjeve dhe aktivistë të shoqërisë civile.
Ndërkohë të enjten ambasadori i BE-së në Kosovë u shpreh “i lumtur që Kosova ka miratuar ligje të rëndësishme për procesin e integrimit evropian”.
Ambasadori i Bashkimit Evropian në Kosovë, Tomas Szunyog, është shprehur i lumtur që në dy javët e fundit në Kosovë janë miratuar disa ligje që siç ka thënë, janë të rëndësishme për procesin e integrimit evropian.
Këtu ai ka përmendur Ligjin për Agjencinë për Parandalimin e Korrupsionit, Ligjin e ri për Deklarimin e Pasurisë dhe Kodin e ri për Procedurën Penale.
Në një postim në Twitter, Szunyog ka thënë se miratimi i këtyre ligjeve paraqet një hap kyç legjislativ në garantimin e sundimit të ligjit dhe luftimin e krimit të organizuar dhe korrupsionit.
“Më vjen mirë që gjatë 2 javëve të fundit Kuvendi i Kosovës ka miratuar disa ligje që janë të rëndësishme për procesin e integrimit evropian, përfshirë këtu Ligjin për Agjencinë për Parandalimin e Korrupsionit, Ligjin e ri për Deklarimin e Pasurisë dhe Kodin e ri për Procedurën Penale”.
“Miratimi i këtyre ligjeve paraqet një hap kyç legjislativ në garantimin e sundimit të ligjit dhe luftimin e krimit të organizuar dhe korrupsionit, dhe ato janë gjithashtu pjesë e Agjendës së Reformës Evropiane II”, ka shkruar ambasadori.
Tutje, ka thënë se BE-ja do të vazhdojë të mbështesë forcimin e sundimit të ligjit në Kosovë dhe punën e Agjencisë për Parandalimin e Korrupsionit.
Kuvendi i Kosovës të enjten ka miratuar në parim Projektligjin për Byronë Shtetërore për Verifikimin dhe Konfiskimin e Pasurisë së Pajustifikueshme, me 58 vota për dhe 3 abstenime, ndërsa me këtë rast ministrja e Drejtësisë, Albulena Haxhiu theksoi se rekomandimet e Komisionit të Venecias do të adresohen të gjitha pranë grupit punues të Komisionit për Legjislacion.
Gjithashtu, në të njëjtën seancë, me shumicë të votave të deputetëve u votua në lexim të dytë edhe Projektligji për Deklarimin, Prejardhjen dhe Kontrollin e Pasurisë dhe të Dhuratave.
Ministria e Drejtësisë ka njoftuar se Projektligji për Deklarimin, Prejardhjen dhe Kontrollin e Pasurisë dhe të Dhuratave ka për qëllim përcaktimin më të qartë të procedurave të deklarimit të pasurisë, ri klasifikimi i pozitave që duhet të deklarojnë pasurinë, jo vetëm nga cilësimi i pozitave të larta publike, por edhe nga cilësimi i secilës pozitë ku ka potencial për abuzim, keqpërdorim të parasë publike dhe konflikt të interesit.
Përveç të tjerave mori mbështetjen e deputetëve të Kuvendit të Republikës së Kosovës edhe projekt-kodi i Procedurës Penale.
Rruga Press