Gjermania s’do të blejë qymyrin rus nga 1 gushti dhe naftën nga 31 dhjetori

Gjermania do të ndalojë plotësisht blerjen e qymyrit rus më 1 gusht dhe naftës ruse më 31 dhjetor, gjë që do të shënojë një ndryshim të madh në burimin e furnizimit me energji të vendit, ka thënë zëvendësministri i Financave Joerg Kukies në një konferencë në Sydney të Australisë, shkruan BBC.

Sfida kryesore do të jetë plotësimi i boshllëkut të madh që do të lihet kur Bashkimi Evropian të largohet nga 158 miliardë metra kub gaz të furnizuar nga Rusia çdo vit, shtoi Kukies.

“Ne do të jemi pa qymyrin rus brenda disa javësh”, u shpreh ai në Forumin e Energjisë në Sydney, të bashkëorganizuar nga qeveria australiane dhe Agjencia Ndërkombëtare e Energjisë.

Rusia furnizonte 40 për qind të qymyrit të Gjermanisë dhe 40 për qind të naftës së saj.

“Kushdo që e njeh historinë e gazsjellësit të Druzhbës, i cili tashmë ishte një mjet i perandorisë sovjetike mbi Evropën Lindore, të heqësh qafe këtë varësi nuk është një gjë e parëndësishme, por është diçka që ne do ta arrijmë brenda disa muajsh”, vijoi Kukies.

Gjermania po zhvillon me shpejtësi terminalet e importit të gazit natyror të lëngshëm (LNG) për të ndihmuar në plotësimin e boshllëkut të furnizimit me gaz, por ai theksoi se ndërsa Shtetet e Bashkuara dhe Katari së bashku mund të dërgojnë rreth 30 miliardë metra kub gaz në formë LNG në Evropë, ka ende një hendek të madh.

“Ne nuk mund ta imagjinojmë që ky problem të zgjidhet”, ka thënë Kukies.

Sipas Kukies, ndërsa Gjermania ishte e përqendruar në lëvizjen drejt emetimeve neto zero dhe kohët e fundit kishte futur legjislacionin për të përshpejtuar zhvillimin e projekteve të energjisë së rinovueshme, gazi do të ishte thelbësor për ndryshimin.

Rruga Press