Ish-kancelari gjerman nuk heq dorë nga “dashuria” për Putinin: Nuk ju trembem kritikave, do mbaj kontakte me të

Ish-kancelari gjerman, Gerhard Schroeder, vijon ta konsiderojë mik presidentin rus Vladimir Putin.

Schroeder deklaroi se dëshiron të mbajë kontakte me presidentin rus, pavarësisht presionit që të ndërpresë miqësinë me të, për shkak të luftës së Rusisë në Ukrainë. “Unë nuk do të heq dorë nga mundësitë e mia për bisedime me presidentin Putin”, tha Schroeder për gazetën gjermane, Frankfurter Allgemeine Zeitung.

Schroeder, socialdemokrat, ka qenë kancelar i Gjermanisë nga viti 1998 deri më 2005 dhe, pas largimit nga detyra, është bërë kryetar i bordit të kompanisë shtetërore ruse të naftës, Rosneft.

Ai ka dhënë dorëheqje nga pozita në Rosneft në maj dhe ka refuzuar nominimin në bordin e gjigantit tjetër rus, Gazprom, që është bërë përpara se Rusia të niste pushtimin e Ukrainës, më 24 shkurt.

Schroeder tha se nuk beson në zgjidhjen ushtarake të konfliktit në Ukrainë. Ai shtoi se pas takimit me Putinin në mars, ka përshtypjen se presidenti rus është i interesuar për zgjidhje të negociuar. “Se si duket një zgjidhje e tillë, mund të sqarohet vetëm me negociata”, tha Schroeder.

Schroeder e bëri të qartë se ai beson se Ukraina është fajtore për dështimin e negociatave deri më tani. Anëtarë të tjerë të Partisë Social Demokrate të Gjermanisë (SPD) janë distancuar nga Schroeder.

Rruga Press