Vendet evropiane po kthehen te qymyri ‘i pistë’, pasi Rusia kërcënon të mbyllë gazin

Ndërkohë që Rusia kërcënon se do të kufizojë furnizimet me gaz këtë dimër, disa vende evropiane po përpiqen që tani që nevojat e tyre për energji të plotësohen gjatë periudhës më të ftohtë të vitit.

Nga ana tjetër, kjo do të thotë se do të tërhiqen nga premtimet e tyre për klimën në favor të ndezjes së termocentraleve me qymyr.

Agjencia Ndërkombëtare e Energjisë (IEA) ka paralajmëruar se Evropa duhet të jetë gati që Rusia të mbyllë të gjitha eksportet e gazit në rajon këtë dimër. Megjithëse pranon se ky nuk është skenari më i mundshëm, ai mund të shtrohet në tavolinë ndërsa vendi kërkon të përfitojë nga levat politike.

Kreu i Agjencisë, Fatih Birol, i tha Financial Times se masat e marra nga qeveritë evropiane nuk kishin shkuar aq larg sa duhet për të siguruar që furnizimet me energji ishin gati për një ndërprerje të mundshme. Blloku, shtoi ai, ka nevojë për një plan emergjence – veçanërisht kur bëhet fjalë për gazin.

Dhe ndërsa BE-ja ka punuar për të reduktuar varësinë e saj nga karburantet fosile ruse, disa shtete anëtare paralajmërojnë se kjo mund të nënkuptojë djegien e më shumë qymyri për të kapërcyer hendekun energjetik.

Javën e kaluar, Rusia uli kapacitetin e gazsjellësit Nord Stream 1 me 60 për qind, duke u justifikuar me një çështje teknike. Ai është një nga rrugët kryesore që vendi sjell gazin e tij në Evropë.

Të dielën, Gjermania dhe Austria njoftuan një rihapje urgjente të termocentraleve të qymyrit. Deri të hënën, Holanda e kishte ndjekur shembullin, duke hequr të gjitha kufizimet për termocentralet që përdorin lëndë djegëse fosile. Më parë, ato ishin të kufizuara në pak më shumë se një të tretën e prodhimit të energjisë së vendit.

Rruga Press