Arsyet se pse Gjermania po refuzon planin e BE-së për ndalimin e veturave me lëndë djegëse fosile nga 2035-ta

Qeveria e Gjermanisë nuk është pajtuar me planet e Bashkimit Evropian për të ndaluar efektivisht shitjen e veturave të reja me motorë me djegie nga viti 2035, ka thënë të martën ministri i Financave, Christian Lindner, shkruan Reuters.

Në përpjekjen për të ulur emetimet e ngrohjes së planetit me 55% deri në vitin 2030 nga nivelet e vitit 1990, Komisioni Evropian ka propozuar një reduktim 100% të emetimeve të CO2 nga veturat e reja deri në vitin 2035. Kjo do të thotë se do të ishte e pamundur të shiten vetura me motorë me djegie atëherë.

Ligjvënësit e Parlamentit Evropian i mbështetën propozimet këtë muaj, përpara se të zhvillohen negociatat me vendet e BE-së mbi ligjin përfundimtar.

Duke folur në një ngjarje të organizuar nga shoqata e industrisë gjermane BDI, Lindner ka thënë se do të vazhdonin të kishte vende për motorët me djegie, kështu që ndalimi ishte i gabuar dhe shtoi se qeveria nuk do të pajtohej me këtë legjislacion evropian.

Lindner, një anëtar i Demokratëve të Lirë pro-biznesit, i cili ndan pushtetin me Social Demokratët dhe të Gjelbrit, ka thënë se Gjermania do të ishte ende një treg udhëheqës për automjetet elektrike.

Rruga Press