Ukraina raporton edhe për 24 fëmijë të vrarë në Mariupol

Zyra e Prokurorit të Përgjithshëm të Ukrainës bëri të ditur të shtunën se ka mësuar për vdekjen e 24 fëmijëve të tjerë në Mariupol, qyteti port juglindor që ishte i rrethuar për javë të tëra përpara se forcat ruse ta kapnin atë në mes të majit.

Në total, zyra tha se të paktën 287 fëmijë kanë vdekur që nga fillimi i pushtimit rus të Ukrainës në 24 shkurt. Ndërkaq, më shumë se 492 janë plagosur.

“Gjatë regjistrimit të veprave penale, është bërë e ditur se 24 fëmijë të tjerë kanë vdekur në Mariupol, rajoni Donetsk, si rezultat i granatimeve pa kriter nga ushtria ruse”, tha zyra në aplikacionin e mesazheve Telegram.

Kryebashkiaku i Mariupolit, Vadym Boychenko, ka thënë se në qytet ka shpërthyer kolera pasi sistemet e kanalizimeve u prishën dhe kufomat po kalben në rrugë.

Kievi dhe aleatët e tij thonë se Ukraina u pushtua pa provokim.

Në fillim të qershorit, Kombet e Bashkuara thanë se më shumë se 250 fëmijë janë vrarë që nga fillimi i luftës dhe pesë milionë mbeten në rrezik të dhunës dhe abuzimit.

Rruga Press